You are here:መነሻ ገፅ»ዜና

የኢሕአዴግ ድርጅታዊ ህገ ደንብ፤ ስለግንባሩ ሊቀመንበር አመራረጥ ምን ይላል?

Wednesday, 28 February 2018 12:27


 

በኢህአዴግ ህገ ደንብ መሰረት 180 አባላት ያሉት ከእያንዳንዱ እህት ድርጅት 45 የሚወከሉበት ምክር ቤት አለው፡፡ የኢህአዴግ ምክርቤት የድርጅቱን ሊቀመንበር በሚስጥር ድምፅ ይመርጣል። በድምፅ አሰጣጡ ላይ 180 የምክር ቤት አባላት እኩል ድምፅ አላቸው።


በህገ ደንቡ መሰረት አራቱም ድርጅቶች የኢህአዴግ ሊቀመንበር እና ምክትል ሊቀመንበር እጩ የማቅረብ መብት አላቸው። ለሊቀመንበርነት የሚወዳደሩት የድርጅቶቹ ሊቀመናብርት ይሆናሉ። በህገ ደንቡ መሰረት ሊቀመንበሩ የድርጅቱ የበላይ አስፈፃሚ መሆኑን ቢገልፅም በመንግስት ስልጣን ውስጥ ጠቅላይ ሚኒስትር ይሆናል የሚል በግልፅ የተቀመጠ ደንብ የለም።


በተለምዶ አሰራራቸው የግንባሩ ሊቀመንበር በቀጥታ የኢትዮጵያ መንግስት ጠቅላይ ሚኒስትር ይሆናል፡፡ በተለይ ከሃምሳ በመቶ በላይ ድምጽ በፓርላማው ድርጅቱ ስላለው በቀላሉ መንግስት የመመስረት እድሉ ሰፊ ነው፡፡ በሌሎች ሀገራት ግን በጣም ተፎካካሪ ፓርቲዎች በፓርላማ ከፍተኛ መቀመጫ ስለሚያገኙ ውድድሩ ቀላል አይደለም፡፡


የሰበሰብናቸው መረጃዎች እንደሚያሳዩት ሕወሓት ለሊቀመንበርነት ቦታ እጩ አያቀርብም፡፡ የሕወሓት ሊቀመንበር ዶክተር ደብረጺዮን ገ/ሚካኤል የትግራይ ክልል በርዕሰ መስተዳድር ማዕረግ በምክትል ርዕሰ መስተዳድር መሾማቸውን ልብ ይሏል፡፡


ብአዴን በሊቀመንበርነት አቶ ደመቀ መኮንን እጩ አድርጎ ያቀርባል፡፡ ሆኖም ድርጅቱ፤ ባደረገው ግምገማ የጠቅላይ ሚኒስትር ኃ/ማሪያም ደሳለኝ በመንግስትና በድርጅት የስትራቴጂክ ሊደርሺፕ አቅም ማነስ መስተዋሉን ይፋ አድርጓል፡፡ አቶ ደመቀ መኮንን የድርጅቱ ምክትል ሊቀመንበርና ምክትል ጠቅላይ ሚኒስትር በመሆናቸው ለውድድር ቢቀርቡም፣ በጠቅላይ ሚኒስትር ኃ/ማሪያም ደሳለኝ ላይ የተሰጠው ግምገማ በእሳቸውም ላይ ተግባራዊ ስለሚሆን የመመረጥ እድላቸው አናሳ ነው፡፡


ኦህዴድ ለድርጅት ሊቀመንበርነት በእጩነት ዶክተር አብይ አህመድን ያቀርባል ተብሎ ይጠበቃል፡፡ ኦሕዴድ የሚያቀርባቸው እጩ በትምህርት ዝግጅት እና በሥራ ልምድ ያላቸው ብቃት ተቀባይነቱ ከፍ ያለ ነው፡፡ የተማሩት የትምህርት ዘርፎችም በርከት ስለሚሉ ግንዛቤያቸው ከፍተኛ ተደርጎ የሚወሰድ ነው፡፡ በተለይ በአሁኑ ሰዓት በክልሎች መካከል በተደጋጋሚ እየተፈጠረ ባለው የድንበር ግጭት ብዙ ሕይወትና ቁሶችን ሀገሪቷ እያጣች በመሆኑ ከፍተኛ የግጭት አፈታት ትምህርትና ልምድ ያለው አመራር አስፈላጊ ነው፡፡ ከዚህ አንፃር ኦሕዴድ ያቀርባቸው እጩ የመመረጥ እድላቸው ከፍተኛ ነው፡፡ በተለይ የኦሕዴድ ማዕከላዊ ኮሚቴ እና የሶህዴፓ ማዕከላዊ ኮሚቴ በመካከላቸው የተፈጠረው የድንበር ግጭት በጋራ ለመፍታት መስማማታቸው አፈፃጸሙን ለማፋጣን ያለው እድል ከፍተኛ ነው፡፡


ደኢሕዴድ አቶ ሽፈራው ሽጉጤን እንደሚያቀርብ ታውቋል፡፡ አቶ ሽፈራው በርካታ ብሔር ብሔረሰቦች ያሉበትንን ክልል ለረጅም ዓመታት ጊዜ መርተዋል፡፡ በተለያዩ የኃላፊነት ደረጃዎች ላይ ተሹመው እያገለገሉ ይገኛሉ፡፡ ሆኖም በቅርብ ከትምህርት ሚኒስትርነት ቦታቸው እንዲለቁ የተደረገበት ፍጥነት ከአፈፃጸማቸው ጋር የሚገናኝ ከሆነ፣ ጠቅላይ ሚኒስትር ሆነው ለመቀጠል ያዳግታቸዋል ተብሎ ሊወሰድ ይችላል፡፡


በአጠቃላይ ግን በሚስጥር የሚሰጠውን የድምጽ ውጤት ፓርቲዎቹ የሚሰጡት ትርጉም፣ ጥንቃቄ በተሞላበት ሁኔታ ካልያዙትና ካልመነዘሩት ምን ሊፈጠር እንደሚችል መገመት ከባድ ነው፡፡ በመመካከርና በመግባባት የሚፈጽሙት ከሆነ ግን፣ ለሰላምና ለመረጋጋት ያለው ፋይዳ ምትክ አልባ ነው፡፡

ይምረጡ
(4 ሰዎች መርጠዋል)
3927 ጊዜ ተነበዋል

Sendek Newspaper

Bole sub city behind Atlas hotel

Contact us