You are here:መነሻ ገፅ»ዜና

አቶ ኃይለማርያም ደሳለኝ ከኃላፊነታቸው ተሰናብተውም ሙሉ ደመወዝና አበላቸው አይቋረጥም

Wednesday, 28 February 2018 12:31

እየተጋጋለ የመጣውን ሕዝባዊ አመጽ ተከትሎ «የመፍትሔው አካል መሆን አለብኝ» በሚል ራሳቸውን ከገዥው ፓርቲ ሊቀመንበርነት እና ከአገሪቱ ጠቅላይ ሚኒስትርነት ያሰናበቱት አቶ ኃይለማርያም ደሳለኝ ተገቢው ጥቅማ ጥቅማቸው የሚከበርላቸው መሆኑን ስማቸውን መጥቀስ ያልፈለጉ የሕግ ባለሙያዎች ጠቆሙ።

 

ከኃላፊነት የተነሱ የሀገርና የመንግሥት መሪዎች፣ ከፍተኛ የመንግሥት ኃላፊዎች፣ የምክርቤት አባሎች እና ዳኞች የሚያገኙዋቸው መብቶችና ጥቅሞች በሚደነግገው አዋጅ ቁጥር 653/2001 በኃላም በአዋጅ ቁጥር 934/2008 እንደተሻሻለው መሠረት አቶ ኃይለማርያም የመቋቋሚያ አበል ክፍያ፣ በኃላፊነት በነበሩ ጊዜ ይከፈላቸው የነበረ የወር ደመወዝና አበል ከኃላፊነታቸው ከተነሱ በኃላም ሳይቋረጥ የሚቀጥል ይሆናል።


በተጨማሪም በሥራ ላይ የሚገኘው ጠቅላይ ሚኒስትር የደመወዝና የአበል ማስተካከያ ሲደረግለት ተሰናባቹ ጠቅላይ ሚኒስትርም በተመሳሳይ ሁኔታ ማሻሻያ እንደሚደረግላቸው አዋጁ ያዛል።

 

የመኖሪያ ቤት አገልግሎት በተመለከተ፣


ለራሳቸውና ለቤተሰቦቻቸው የሚያገለግል የሠራተኞች ወጪን ጨምሮ በመንግሥት ወጪ የሚተዳደር ከአራት እስከ አምስት ክፍሎች ያሉት የመኖሪያ ቤት እንደሚሰጣቸው በአዋጁ መደንገጉን ጠቁመዋል።

 

የሕክምና አገልግሎትን በተመለከተ፣


በመንግሥት ወጪ በአገር ውስጥ እና የውጭ አገር የተሟላ የሕክምና አገልግሎት በፈለጉ ጊዜ ያገኛሉ።

 

የግል ደህንነት ጥበቃ አገልግሎትን በተመለከተ፣


ለራሳቸውና ለቤተሰባቸው ደህንነት ሲባል ጠባቂዎች በመንግሥት ወጪ ይመደቡላቸዋል።

 

የፕሮቶኮል አገልግሎት፣


የዲፕሎማቲክ ፓስፖርትና የቪአይፒ አገልግሎት ያገኛሉ። ቀድሞ በስራ ላይ በነበሩ ጊዜ ያገኙ የነበረውን የሚመጥን በአገር ውስጥና በውጭ አገር ሙሉ የፕሮቶኮል አገልግሎት ያገኛሉ።

 

የተሽከርካሪ አገልግሎት


ደረጃቸውን የጠበቁ ሶስት የመንግሥት ተሸከርካሪዎች ይመደብላቸዋል። የተሽከርካሪው ሹፌር ደመወዝ፣ የነዳጅና የጥገና እንደዚሁም ሌላ ወጪ በመንግሥት ይሸፈናል። ለባለመብቱና ለቤተሰቡ ጥበቃ አገልግሎት የሚውሉ ተሽከርካሪዎች ዓይነትና ብዛት ጥበቃውን በሚያካሂደው አካል ይወሰናሉ።


የስልክ አገልግሎት፣


ወጪው በመንግሥት የሚሸፈን ሁለት መደበኛ ስልኮች በመኖሪያ ቤቱ ውስጥ እና አንድ ለግሉ ይኖረዋል። ለጥበቃ የሚውሉ ስልኮች ዓይነትና ብዛት ጥበቃውን በሚካሂደው አካል የሚወሰን ይሆናል።

 

የቢሮ አገልግሎት፣


ተሰናባቹ ጠቅላይ ሚኒስትር በተለያዩ ሕዝባዊ አገልግሎቶች ላይ ከተሰማሩ መኖሪያ ቤቱ በሚገኝበት ከተማ የቢሮ አገልግሎት ይሰጣቸዋል። ባለመብቱ የሚመርጣቸውና መንግስት ደመወዛቸውን የሚከፍላቸው አንድ ጸሐፊና አንድ ባለሙያ ይኖረዋል። ለቢሮው የሚያስፈልገው ኮምፒውተሮች፣ ሰልክ፣ ኢንተርኔት፣ ፖስታ እና የመሳሰሉት በመንግስት ተሟልተው ወጪያቸውም ይሸፈናል።


ጠቅላይ ሚኒስትር አቶ ኃይለማርያም ደሳለኝ የሕዝብ ተወካዮች ምክርቤት በዚህ ሳምንት መጨረሻ ድረስ በጥያቄያቸው መሠረት አሰናብቶ በምትካቸው በገዥው ፓርቲ ኢህአዴግ የሚቀርብለትን አዲስ ጠቅላይ ሚኒስትር በመቀበል ቃለመሀላ ያስፈጽማል ተብሎ ይጠበቃል።

ይምረጡ
(0 ሰዎች መርጠዋል)
3930 ጊዜ ተነበዋል

Sendek Newspaper

Bole sub city behind Atlas hotel

Contact us