You are here:መነሻ ገፅ»ዜና

ባለቤቱን ኢ- ሰብዓዊ በሆነ መንገድ የገደለው በእድሜ ልክ እሥራት ተቀጣ

Wednesday, 14 March 2018 12:39

የፌዴራል የመጀመሪያ ደረጃ ፍርድ ቤት አቃቂ ቃሊቲ ምድብ 3ኛ ወንጀል ችሎት ባለቤቱን ኢ- ሰብዓዊ በሆነ መንገድ የገደለውን ተከሳሽ ታጠቅ ፍቃዱ ገ/ፃዲቅ በዕድሜ ልክ ጽኑ እስራት ቀጣ።

 

የክስ መዝገቡ እንደሚያስረዳዉ ተከሳሽ የኢ.ፊ.ዴ.ሪ የወንጀል ሕግ አንቀጽ 539/1/ሀ/ ላይ የተመለከተዉን በመተላለፍ መጋቢት 01 ቀን 2009 ዓ.ም በግምት ከጥዋቱ 1 ሰዓት ከ15 ደቂቃ ሲሆን በንፋስ ስልክ ላፍቶ ክፍለ ከተማ ወረዳ 10 ክልል ልዩ ቦታው ቀይ አፈር መሸጋገሪያ ድልድይ ተብሎ በሚጠራው አካባቢ የግል ተበዳይ እልፍነሽ በቀለን ስድስት ሜትር ጥልቀት ባለው ገደል ውስጥ በመወርወር፣ ነውረኝነትንና ጨካኝነትን በሚያሳይ ሁኔታ ህይወቷ እንዲያልፍ ያደረገ በመሆኑ በፈፀመው ከባድ የግድያ ወንጀል ተከሷል።


የፌዴራል ዐቃቤ ሕግ ተከሳሽ በፈፀመዉ ወንጀል ተጠያቂ መሆን የሚችልበትን በፖሊስ የምርምራ መዝገብና የሰዉ ምስክሮች፣ አስከሬን ምርመራ ዉጤት መግለጫ ማስረጃ በማያያዝ ለፌዴራሉ የመጀመሪያ ደረጃ ፍርድ ቤት አቃቂ ቃሊቲ ምድብ 3ኛ ወንጀል ችሎት አቅርቧል::


ተከሳሽ በችሎት ቀርቦ ክሱ ተነቦለት እንዲረዳው ከተደረገ በኋላ የእምነት ክህደት ቃሉን ሲጠየቅ ድርጊቱን ፈፀሜያለሁ ጥፋተኛ ነኝ በስሜት ውስጥ ገብቼ ያደረኩት እንጂ ጨካኝ ሆኜ አይደለም በማለት ተናግሯል።


የፌዴራል ዐቃቤ ሕግ ተከሳሽ በተከሰሰበት የወንጀል ድርጊት ያመነ በመሆኑ ሌላ ማስረጃ መስማት ሳያስፈልግ የጥፋተኝነት ውሳኔ እንዲሰጥ በማለት ለፍርድ ቤቱ አስተያየት ሰጥቷል። ፍርድ ቤቱም ግራ ቀኙን መርምሮ ተከሳሹ በተከሰሰበት ወንጀል መሠረት ጥፋተኛ ነህ ብሎታል::


የፌዴራል የመጀመሪያ ደረጃ ፍርድ ቤት አቃቂ ቃሊቲ ምድብ 3ኛ ወንጀል ችሎት የካቲት 07 ቀን 2010 ዓ.ም በዋለዉ ችሎት መዝገቡን መርምሮ በተከሰሰበት ክሰ ሪከርድ ያልቀረበበትና እጁን ለፖሊስ የሰጠ በመሆኑ በማቅለያነት በመቀበል ድርጊቱን በትዳር አጋሩ ላይ በመፈፀሙ በማክበጃነት በመያዝ ተከሳሹን ያርማል፣ ሌሎችንም ያስተምራል በማለት በዕድሜ ልክ ፅኑ እስራት እንዲቀጣ ወስኗል ሲል የፌዴራል ጠቅላይ ዐቃቤ ህግ የህዝብ ግንኙነትና የኮሙኒኬሽን ጉዳዮች ዳይሬክቶሬት የላከልን ዘገባ ያስረዳል። 

ይምረጡ
(0 ሰዎች መርጠዋል)
2384 ጊዜ ተነበዋል

Sendek Newspaper

Bole sub city behind Atlas hotel

Contact us