You are here:መነሻ ገፅ»ዜና

በኹለቱ የዋልድባ መነኰሳት ላይ ዐቃቤ ሕግ ምስክሮቹን ባለማቅረቡ ፍ/ቤቱ ለሚያዝያ 18 ቀጠረ

Wednesday, 28 March 2018 12:18

• ዐቃቤ ሕግ እና ፖሊስ፣ “ምስክሮቹ ያልቀረቡበትን ምክንያት አናውቅም፤” አሉ፤

 

በእነተሻገር ወልደ ሚካኤል ላቀው የክሥ መዝገብ “በሽብር ወንጀል” በተከሠሡት ኹለቱ የዋልድባ መነኰሳት፥ አባ ገብረ ኢየሱስ ኪዳነ ማርያም (4ኛ ተከሣሽ) እና አባ ገብረ ሥላሴ ወልደ ሃይማኖት (5ኛ ተከሣሽ) እንዲሁም 2ኛ ተከሣሽ ላይ ምስክሮችን ለማሰማት ትላንት ቀጠሮ የተያዘለት የፌዴራሉ ዐቃቤ ሕግ፣ ምስክሮቹን ማቅረብ ሳይችል የቀረ ሲኾን፤ ከተከሣሾቹ አንዱ የኾኑት አባ ገብረ ኢየሱስ ኪዳነ ማርያም በበኩላቸው፣ “አብረውን ከተከሠሡት ከ32ቱ የተለየነውና የማንፈታው ለምንድን ነው? ያሰረንስ አካል ማን ነው?” ሲሉ ችሎቱን ጠየቁ፡፡


ዐቃቤ ሕግ ምስክሮችን ለማቅረብ ዳተኝነት እየታየበት እንደኾነ ባለፈው ቀጠሮ የጠቀሰው የፌዴራሉ ከፍተኛ ፍ/ቤት 4ኛ ወንጀል ችሎት፣ ከአቅም በላይ የኾነ ችግር ካላጋጠመ በቀር ለዛሬ መጋቢት 18 ቀን አሟልቶ እንዲያቀርብ አስጠንቅቆት የነበረ ቢኾንም፣ አቅርቦ ሳያስደምጥ ቀርቷል፡፡


ካህናትንና መነኰሳትን ጨምሮ ከፍተኛ የሕዝብ ቁጥር በታደመበት የዛሬው ችሎት፣ ምስክሮቹ በምን ምክንያት እንደቀሩበት በፍ/ቤቱ የተጠየቀው ዐቃቤ ሕግ፣ “ለምን እንዳልመጡ አላውቅም፤ ምንም የማውቀው ጉዳይ የለም፤” የሚል ምላሽ ነው የሰጠው፡፡


ዐቃቤ ሕግ ማስረጃዎቹን በጊዜው የማቅረብ ግዴታ ቢኖርበትም በተደጋጋሚ ምስክሮቹ መቅረታቸውን ያወሱት የተከሣሽ ጠበቆች፣ ፍትሕን እንደሚያጓድልና የፍ/ቤቱንም የሥራ ሒደት እንደሚያስተጓጉል አስረድተዋል፤ የዐቃቤ ሕግ ምስክር የማስደመጡ ሒደት ታልፎ አለ በተባለው የሰነድ ማስረጃ ለብይን እንዲቀጠርላቸው ጠይቀዋል፡፡ የማዕከላዊ መርማሪ የኾኑት አቶ አብዲ የፌዴራል ፖሊስን ወክለው ለችሎቱ መልስ እንዲሰጡ ሲታዘዙ፣ ምስክሮቹ በመቅረታቸው ዙሪያ ምንም የሚያውቁት ጉዳይ እንደለሌ ተናግረዋል፡፡


ፍ/ቤቱም፣ ዐቃቤ ሕግም ይኹን የፌዴራል ፖሊስ፣ ምስክሮች የቀሩበትን ምክንያት ባልገለጹበትና ምንም እንደማያውቁ በተናገሩበት ኹኔታ፣ ተጨማሪ ጊዜ ሊሰጥ ይገባል በማለት ለሚያዝያ 18 ቀን 2010 ዓ.ም. ተለዋጭ ቀጠሮ ሰጥቷል፡፡ ተከሣሾች ወደ ችሎት ሲገቡ ከመቀመጫው በመነሣት አክብሮቱን የገለጸው በመቶዎች የሚቆጠር ተመልካች፣ የፍ/ቤቱን ውሳኔ በመቃወም በችሎቱ የማጉረምረም ድምፅ ማሰማቱ ታውቋል፤ የሚያለቅሱም ነበሩ፡፡


በ1996 ዓ.ም. የወጣውን የወንጀለኛ መቅጫ ሕግ አንቀጽ 32/1/(ሀ)(ለ)(38) እና በፀረ ሽብር ዐዋጁ ቁጥር 652/2001 አንቀጽ 4 ሥር የተደነገገውን ተላልፈዋል ተብለው የተከሠሡት ኹለቱ መነኰሳት፣ ዋስትና ተከልክለው በእስር አንድ ዓመት ከሦስት ወር ማስቆጠራቸውን የተከሣሽ ጠበቆች ገልጸዋል፡፡


የፍ/ቤቱ ተለዋጭ ቀጠሮ እንደተሰማ እጃቸውን በመስቀል አምሳያ አንሥተው ለመናገር እንዲፈቀድላቸው አጥብቀው የጠየቁት 4ኛ ተከሣሽ አባ ገብረ ኢየሱስ፣ “ከእኛ ጋራ በተመሳሳይ መዝገብ ተከሠው የነበሩ 32 ሰዎች በመንግሥት ዐዋጅ ተፈተዋል፤ እኛ ተለይተን የማንፈበት ምክንያት ምንድን ነው? ያሰረንስ ማነው?” በማለት ጠይቀዋል፡፡ የመሀል ዳኛው፣ “ስለ እርሱ እኛ የምናወቀው ጉዳይ የለም፤ እኛን አይመለከተንም፤ የበላይ አካል ያደረገው ነው፤” ብለው ሲመልሱላቸው፣ “መንግሥት እና ፍ/ቤት አንድ አይደለም ወይ?” በማለት መልሰው ጠይቀዋል፤ ዳኛውም፣ የሦስቱን የሕግ አካላት ሚና እና ልዩነት በማስረዳት ሲሉ ምላሽ ሰጥተዋል፡፡

ይምረጡ
(0 ሰዎች መርጠዋል)
698 ጊዜ ተነበዋል

Sendek Newspaper

Bole sub city behind Atlas hotel

Contact us