You are here:መነሻ ገፅ»ዜና

በአማራ ክልል ሰሜን ጎንደር ዞን እና በሱዳን አዋሳኝ ድንበር ላይ በተነሳ ግጭት ሰዎች ሞቱ

Wednesday, 04 July 2018 12:33

በይርጋ አበበ

 

በኢትዮጵያ እና ሱዳን አዋሳኝ ድንበር በሆነው የጎንደር ምዕራባዊ ዞን መተማ ከተማ አካባቢ በተነሳው ግጭት ሰዎች መሞታቸውን የምዕራብ ጎንደር ዞን አስተዳዳሪ አቶ ዘላለም ልጃለምን ዋቢ አድርጎ የአማራው ክልል መገናኛ ብዙሃን ዘግቧል።

ግጭቱ የተፈጠረው ትናንት ማለዳ ሲሆን የግጭቱ ምክንያትም የእርሻ መሬት መሆኑን ዋና አስተዳዳሪው መናገራቸው ተገልጿል። በግጭቱ እስከ ትናንት አመሻሽ ድረስ በኢትዮጵያዊያን በኩል ሁለት አርሶ አደሮች የሞቱ መሆኑን አስተዳዳሪው ተናግረዋል። ከግጭቱ በኋላ የኢትዮጵያ መከላከያ ሰራዊት በቦታው መግባቱ ተገልጿል።

የምዕራብ ጎንደር ዞን ዋና አስተዳዳሪ አቶ ዘላለም ልጃለም እንደገለጹት የእርሻ መሬቱን ለረጅም ዓመታት እየተጠቀሙበት የሚገኙት የኢትዮጵያ አርሶ አደሮች ናቸው። አሁን ግን የሱዳን አመራሮች ‹‹የእርሻ መሬቱን መጠቀም ያለብን እኛ ነን››  የሚል ሀሳብ አቅርበዋል። ሃሳቡ ተገቢነት የሌለዉ መሆኑንም ለአካባቢዉ የሱዳን አመራሮች አስረድተናል ነው ያሉት አቶ ዘላለም። የሱዳን አመራሮች ግን ሃሳቡን ባለመቀበላቸዉ መግባባት እንዳልተቻለ አቶ ዘላለም ጨምረው ተናግረዋል። ግጭቱ የተከሰተዉ በመተማ ወረዳ ደለሎ ቁጥርየእርሻ እና የኢንቨስትመንት ቦታ እና በሱዳን ባሶንዳ ዞን መካከል በሚገኝ ቦታ ነዉ።

የሰንደቅ ምንጮች ከቦታው ባደረሱን መረጃ እንደገለጹት ደግሞ በአካባቢው በተደጋጋሚ ጊዜ ተመሳሳይ ግጭት ሲፈጠር የቆየ ቢሆንም የአሁኑ ግን ካለፉት ጊዜያት በተለየ እና በተቀናጀ መልኩ የተከፈተ ጦርነት ይመስላል ብለዋል።  

ጉዳዩን ለማጣራት ወደ አማራ ክልል ኮምዩኒኬሽን ጉዳዮች ቢሮ ኃላፊ አቶ ንጉሱ ጥላሁን ደውለንላቸው ነበር። ሆኖም አቶ ንጉሱ ስብሰባ ላይ በመሆናቸው ተጨማሪ መረጃ ማግኘት አልቻልንም።

በኢትዮጵያ እና ሱዳን መካከል ያለውን ግንኙነት ለማጠናከር ጠቅላይ ሚኒስት ዶክተር አብይ አህመድ ወደ ካርቱም አቅንተው ከፕሬዝዳንት ኦማር ሀሰን አልበሽር ጋር የመከሩት ከወራት በፊት ነበር። ፕሬዝዳንት አልበሽርም አገራቸው ከኢትዮጵያ ጋር የሚኖራት ግንኙነት ሰላማዊና ሁለቱንም አገራት ተጠቃሚ በሚደርግ መልኩ እንደሚሆን ፍላጎት እንዳላቸው ተናግረውም ነበር።

ይምረጡ
(0 ሰዎች መርጠዋል)
89 ጊዜ ተነበዋል

Sendek Newspaper

Bole sub city behind Atlas hotel

Contact us