ከተራ ፍላጎት በላይ የሆነ ምኞት ለኢትዮጵያ

Wednesday, 01 March 2017 12:33

 

በያሬድ አውግቸው

የተለያዩ  አለም አቀፍ የዜና ማሰራጫዎች የአሜሪካዎቹ ፌደራልና ይግባኝ ሰሚ ፍርድ ቤቶች  ፕሬዝደንት ዶናልድ ትራምፕ  በሰባት  የኣለማችን ሀገራት ዜጎች ላይ  ያስተላለፉትን ወደ ሃገሪቱ ያለመግባት እገዳ  ውድቅ  ማድረጋቸውን  በቅርቡ አሰምተውናል።  ይህንንም ተከትሎ ፕሬዝደንቱ ህጉን የፍርድ ቤት ንትርክን ለማምለጥ በሚያስችል መልኩ አሻሽለው ለመተግበር  እንቅስቃሴ ላይ  ይገኛሉ ። በተመሳሳይ የጎረቤታችን ኬንያ ፌደራል ፍርድ ቤት የሃገሪቱ መንግስት የዳዳብ የስደተኞች መጠለያን ለመዝጋት ያስተላለፈውን ውሳኔ  ውድቅ ማድረጉም  ከቅርብ ግዜ ዜናዎች መካከል ይጠቀሳል። ምንም እንኳን ውሳኔዎቹ በላይኛዎቹ ፍርድ ቤቶች ሊለወጡ የሚችልበት እድል ያለ ቢሆንም ሂደቱ ግን  አስፈጻሚ አካላቱ ተቆጣጣሪ እንዳላቸው ያሳያል። የዚህ ጽሁፍ አላማ ወደ አሜሪካ እንዳይገቡ የተከለከሉ የሰባቱ ሃገራት ዜጎች አሊያም  የዳዳብ ስደተኞች መጠለያ ነዋሪ ሶማሊያውያን መብት መከበርን  ለማንሳት አይደለም። ይልቁኑም የሁለቱ ሃገራት የፍትህ ስርዓት የደረሰበትን የነጻነት ደረጃ ለማንሳትና ለሃገራችን  የፍትህ ስርዓት ተመሳሳይ ነጻነት በመመኘት እንጂ።

በኔ እምነት በተለይ የኬንያው የፍትህ ስርዓት  ብዙ ልንማርበት የሚገባ እንደሆነ ይሰማኛል።  ጉዳዩን ልንማርበት ይገባል ለማለት ያስደፈረኝ ፍርድ  ቤቶቹ ውሳኔ ያስተላለፉት በውስብስብና  የመንግስት ወገን መከራከሪያዎች የመከሰት እድላቸው ሰፊ በሆነባቸው ጉዳዮች መሆኑ ነው። ሁለቱ ሃገራት  በአለም አቀፍ አሸባሪ ተቋማት መዝገብ ላይ ካላቸው የቀዳሚ ኢላማነት ደረጃ አንጻር የሽብር ተግባራት  የመከሰት እድላቸው የእርግጠኛነት ደረጃ  ይደርሳል ለማለት ይቻላል።  ይህም የፍርድ ቤቶቹ ውሳኔዎች  መብትን በማስከበር የሚቆም ሳይሆን በሃገራቱ ላይ አደገኛ አደጋ ይዞ ሊመጣ የሚችል ያደርገዋል።  ለዚህም ነው ዶናልድ ትራምፕ የሽብር አደጋ ከተከሰተ ተጠያቂው  የሃገራቸው  ፌደራል ፍርድ ቤት ነው ያሉት። አስገራሚው ጉዳይ የሁለቱም ሃገራት ፍርድ ቤቶች በዚህ አጣብቂኝ መካከል ቆመው  የሃገራቸውን ብቻ ሳይሆን አለም አቀፍ የሰብዓዊ መብት ድንጋጌዎችን ጭምር ለማስከበር  ወደ ኃላ የማይል ነጻነት ያላቸው መሆኑ ነው።

የሃገራችን የፍትህ ስርዓት  በተግባር ያለበትን ነጻነት ለመናገር ጥናት የሚፈልግ መሆኑ ባያጠያይቅም ምኞቴ ግን  የሃገራችን የሲቪክ ማህበራት እና ሌሎች ጉዳዩ የሚመለከታቸው የሰብዓዊ መብት ተቋማት በፍትህ ስርዓቱ ላይ እምነት ጥለው የኬንያውን ያህል ክብደትና ሪስክ ባላቸው ትልልቅ ጉዳዮችም ጭምር  የመንግስትን ከፍተኛ አካል በህግ ፊት መሞገት የሚያስችል ነጻነታቸውን ሲጠቀሙ መመልከት ነው። ለምሳሌ እንደ ኬንያው ውስብስብና ሰፊ ሪስክ / Risk/ ያላቸውን ጉዳዮች ትተንየሚኒስትሮችምክርቤትበስልጣንዘመኑከሚያስተላልፋቸውብዛት ያላቸውውሳኔዎችመካከልቢያንስአንዱእንዲሻሻል የፍርድ ቤት የክርክር መዝገብ የሚከፍቱ የሲቪክማህበራት  ጉዳይ ላይ ፍርድ ቤቶች  ውሳኔ ሰጥተው የነጻሜዲያውየትንታኔ  ርእስሲሆኑ መመልከት  ህዝቡበፍትህስርዓቱላይያለውንመተማመን  ይጨምራል። ምክንያቱም የየትኛውም የአለማችን ሃገር ተመሳሳይ ደረጃ ያለው አካል  እንደ አሜሪካና ኬንያ አስፈጻሚ አካላት  የሃገር ውስጥም ይሁን አለም አቀፍ ስምምነቶች  ሊጥሱ  የሚችሉበት ሁኔታ ስላለ።  ሌላው ምሳሌ መንግስት  ከአለም አቀፍ ተቋማት ጋር ከሚዋዋላቸው ብዛት ያላቸው የብድር ስምምነቶች መካከል  ቢያንስ አንዱ አዋጭ ባለመሆኑ ሌላ አማራጭ ይፈለግለት ከሚል ሲቪክ ማህበር አስፈጻሚው አካል የፍርድ ቤት ሙግት ሲገጥመው መመልከት  የሲቪክ ማህበራትን ሚና ከቃላት በላቀ  ጥልቀት የሚያስተምር  ሊሆንም ይችላል።  መንግስት በታችኛው ፍርድ ቤት  የሚያካሂደው ክርክር ውድቅ ሆኖበት ወደ ቀጣዩ  ፍርድ ቤት ጉዳዩን  ወስዶ ሲከራከር ማየትም እንዲሁ በፍትህ ስርኣቱ ላይ ያለን የዜጎች እምነት ያሳድጋል።

እነዚህን ሁሉ ምሳሌዎች ማንሳቴ መንግስት ውሳኔዎቹ ውድቅ ሲሆኑበት  ለመመልከት ካለ ተራ ፍላጎት የመነጨ አይደለም።  ይልቁንም  አስፈጻሚው አካል ውሳኔዎቹን በገለልተኝነት የሚፈትሽለት አካል መኖሩ  ለራሱም  ስለሚጠቅመው እንጂ።  ምክንያቱም አስፈጻሚው አካል  ህገ መንግስቱን& ሌሎች ሃገራዊ ህጎች ወይም አለም አቀፍ  ስምምነቶችን ሊጥስ የሚችልበት ሁኔታ  ይኖራል::

ለማጠቃለል የሲቪክ ማህበራትና የፍርድ ቤቶች ነጻነት መጠናከር ለሰብኣዊ መብቶች መከበር ለብልሹ አሰራሮች መወገድና ሃብትን በተሻለ ለመጠቀም እንዲሁም የመጭውን ትውልድ መብቶች ከማስጠበቅ ኃላፊነት አንጻር የሁላችንንም በተለይ የመንግስትን  ቁርጠኝነት ይፈልጋል።   

ይምረጡ
(0 ሰዎች መርጠዋል)
399 ጊዜ ተነበዋል

Sendek Newspaper

Bole sub city behind Atlas hotel

Contact us