“የተፃፈው ትችት እኔን አይገልፀኝም”

Wednesday, 13 September 2017 12:05

 

·         በሰንደቅ ጋዜጣ ለቀረበ ፅሁፍ የተሰጠ ማስተባበያ

መልአከ ሰላም አባ ነአኩቶ ለአብ አያሌው

ሰንደቅ ጋዜጣ 13ኛ ዓመት ቁጥር 625 ረቡዕ ነሐሴ 24 ቀን 2009 ዓ.ም በገጽ 1 “ከሰማይ ወረደ በሚል ተደጋጋሚ የማታለል በደል የፈፀሙት የደብር አስተዳደሩ በቅዱስ ሲኖዶስ ታገዱ” የሚለውና ዝርዝር ሃተታው በገጽ 12 ታትሞ ለንባብ የበቃው /የዋለው/ ጽሁፍ በመቃወም ማስተባበያ ማቅረብ።

የህትመቱ ዝርዝር ሁኔታ ሲታይ በስም የተጠቀስኩትን የቤተክርስቲያን አገልጋይ ስብእና እና ክብር ያጎደፈ እና የቤተክርስቲያኗንም ማንነት ሉአላዊነት ዝቅ ያደረገ የእምነቱ ተከታዮንም በአባቶቻቸው ላይ ያላቸውን አባታዊ እምነት እንዲያጡ በህግ በአግባብነት ተጣርቶ እኔም ባለጉዳዩ በአካል ቀርቤ በቃልም ሆነ በጽሁፍ መልስ ሰጥቼበት የእምነት ክህደት በሌለበት ጉዳይ በግል እኔን በሚጠሉ ተባብረው ሙሉ ዘመኔን ከኖርኩበት ከእናት ቤተክርስቲያኔ ስልጣናቸውን ተጠቅመውና መከታ አድርገው ከስራና ከደመወዝ ያፈናቀሉኝ ጥቂት ግለሰቦች /ቡድኖች/ ያቀረቡትን የሀሰት ጽሁፍ ተቀብሎ አየር ላይ እንዲውል እና ለንባብ እንዲበቃ መደረጉ እጅግ አሳዝኖኛል።

በመሰረቱ የመንግስትም ሆነ የግል ማንኛውም ሚዲያ እውነትን መሠረት በማድረግ የሀገሪቱን እና የህዝቦቿን ማህበራዊ እሴቶችን ልማት እና እድገት ሌሎችም እውነታ ያላቸው ጉዳዮች የሚገለጽበት እንጂ በህግ እና በእውነት ያልተረጋገጠ የአንድ ዜጋ ስብእና መልካም ስል የሚጎድፍበትን ሀሳብ ከአንድ ወገን ብቻ ተቀብሎ ማስተናገዱ የአንድ ህጋዊ ፈቃድ ያለው ጋዜጣ ስነምግባር መርህ ሊሆን አይገባውም።

ይሁን እና ከላይ በተገለጸው ገፆች ጋዜጣው የዘረዘራቸውን በመቃወም ማስተባበያ እንድሰጥባቸው የምፈልገው በዋናነት የማቀርባቸው ዋና ዋና ነጥቦች የሚከተሉት ናቸው።

 

·         ታቦት ከሰማይ ወረደ በሚል እና በተደጋጋሚ አታለዋል አገላለጽ በተመለከተ

እኔ የተናገርኩት ለመሆኑ ማረጋገጫ ባይኖርም የቤተ ክርስቲያን ቀኖና እና ስርዓት እንደሚደነግገው የታቦቱ ባለቤት ራሱ እግዚአብሔር መሆኑን እና በሊቀ ነቢያት ሙሴ በሲና ተራራ ከሰማይ የወረደውን ታቦት ከእግዚአብሔር እጅ እንደተቀበለ በቅዱሰ መጽሐፍ የተመዘገበ ሲሆን በቤተክርስቲያን አስራር መሠረት

ሀ. ለስሜ መጉደፍ ምክንያት የተገለጸው ታቦት ወረደ የሚለው ጉዳይ በራሱ የአዲስ አበባ ሀገረ ስብከት ሆህተ ጥበብ ጋዜጣ እና የሀገረ ስብከቱ ብሎግ ወይም ድረገጽ በጊዜ ሚዲያው ትክክለኝቱን ያረጋገጠ መሆኑን ማስረጃ በእጄ የሚገኝ እንደሆነ የኢትዮጵያ ኦርቶዶክስ ተዋህዶ አማኞች ማስገንዘብ እፈልጋለሁ።

ለ. በጊዜው በኃላፊነት የነበሩት ሊቃነ ጳጳሳትም የታቦቱን መገኘት በመስማት፣ የእግዚአብሔርን ድንቅ ስራ በመመስከር እና በማስተማር እንዳረጋገጡ በድምጽም ሆነ በምስል ማስረጃው በእጄ ያለው ማስረጃ ያስረዳል። ምክንያቱም ጉዳዩ ምስጢረ ቤተክርስቲያን እንደመሆኑ መጠን በቤተክርስቲያኗ አስተምህሮ በቤተክርስቲያን ተገቢውን ገለፃ ለህዝበ ክርስቲያኑ ከማድረግ በስተቀር ሌሎቹ እንዳሉት የተፈጸመ ስህተት የለም። እኔ እራሴ አምኜበት ህዝቡም እንዲያምንበት ስለ ታቦት የማስተምረው ሀዋርያ ሆኜ ሳለ ታቦቱን ለገንዘብ መሰብሰቢያ እንዳዋልኩት ቤተ ክርስቲያን እና ሀይማኖትን እንዳስነቀፍኩበት ምዕመናንን የሚያርቅ ቀኖናዊ እና አስተዳደራዊ ስነምግባር በተደጋጋሚ እንደፈጽምኩበት በአጣሪ ኮሚቴ የተረጋገጠ መስሎ የቀረበው ሀሳብ በእውነት ሚዛን ሲለካ ለአንድ ወገን እና ለግል ጥቅም የቆሙ ግለሰቦች ያደረጉት እንጂ የማገለግለው ህዝበ ክርስቲያን እንደሚያውቀው ሁሉ አንድም ቀን ከቤተክርስቲያን ተለይቼ የማላድር ኑሮዬም ስራዬም በቅጽረ ቤተ ክርስቲያን ጊቢ ውስጥ መሆኑን እና በከተማ ቤት ተከራይቼ የማልኖር በማንኛውም ጊዜ እና ቦታ ስለ ቤተክርስቲያኗ እና ስለ ሀይማኖቴ ራሴን ለእውነት የማስቀድም መሆኑን እኔን የሚወዱኝ ማህበረ ካህናት እና ምእመናን ህያው ምስክሮቼ ስለሆኑ ከላይ የተጻፈው አባባል ፍጹም ሀሰት ነው።

 

·         በበአለ ንግስ ጊዜ ታቦትን ለቢዝነስ እና ለገንዘብ መሰብሰቢያነት ተጠቅመዋል የሚለውን በተመለከተ

በየትኛውም አውደ ምህረት ለንግስ የተሰበሰበው ህዝበ ክርስቲያን በሚሰጠው ትምህርተ ወንጌል እና በሚተላለፍለት መንፈሳዊ መልእክት በተጨባጭ ሰርተን ያሳየነውን ልማት በአይኑ አይቶ እና ተመልክቶ ለእምነቱ በትሩፋት ገንዘቡን አውጥቶ በፈቃደኝነት ከሚለግስ በስተቀር እንደ ጋዜጣው አባባል ይህንን ክቡር እና አዋቂ ህዝብ በማታለል ከኪሱ የወሰድኩት ገንዘብ የለም። ይልቁንስ በቤተክርስቲን ውስጥ የሚፈፀመውን ግፍና በደል ካህናቱ ቀርቶ ከህዝበ ክርስቲያኑ የተሰወረ አይደለም። መንግስት እና ሚዲያው በዚህ ከፍተኛ ችግር ላይ ቢደርስልን ሌባው እና አታላዩ  ማን እንደሆነ ሊደርሰበት እንደሚችል ጥሪዬን አቀርባለሁ።

 

·         ባቋቋሙት የሽልማት ኮሚቴ ስጦታዎችን ያለ አግባብ ተጠቅመዋል በሚል የተገለፀውን በተመለከተ፡-

1.  ለራሴ የሽልማት ኮሚቴ ያቋቋምኩት ነገር የለም፣

2.  ተሸለመ ለተባለውም ሽልማት ጉዳይ የአንገት አይከን፣ በህይወት በምኖርበት ዘመን ምዕመናንን የምባርክበት የእጅ መስቀል፣ በኋላም ከዚህ ዓለም በሞት ስለይ ለቤተክርስቲያን የማወርሰው እንጂ እንደሌሎች የቅንጦት መኪና እና ቤት አልተሸለምኩም።

3.  “ወርቅ ላበደረ ጠጠር” እንዲሉ አበው ያለ እረፍት ሌት እና ቀን ለልማት ስተጋ፣ ለወንጌል አገልግሎት መስፋፋት ስተጋ ቤተክስቲያንን የይዞታ ቦታ ለማስከበር ከሚመለከተው መንግስታዊ አካል ጋር በመነጋገር ያደረኩትን አስተዋጽኦ እና የኦርቶዶክስ ተዋህዶ ሀይማኖትን ክብር እና መብት ሳስከበር ለቤተ ክርስቲያኗ ሁለንተናዊ ልማት እና እድገት ያበረከትኩትን ከፍተኛ የስራ ፍሬ ውጤት በመመልከት የደብሩ ሰበካ ጉባኤ አባላት፤ ካህናት እና ምዕናን በራሳቸው ተነሳሽነት እና ፈቃደኝነት ከየግላቸው ባዋጡት ገንዘብ የቤተ ክርስቲያኗን አገልጋይነቴን እና የጀመርኩትን የልማት ስራ አጠናክሬ እንድቀጥል ለማበረታታት ሲሉ ለማንኛውም የቤተክርስቲያን አስተዳዳሪ እንደሚደረገው ሁሉ የቤተክርስቲን ሰበካ ጉባኤ አባላት ምዕመናንና ማህበረ ካህናት ባሉበት በአውደ ምህረት በግልጽ የተፈጸመ እንጂ ሰውን አስጨንቄ እና አስገድጄ ለራሴ ከሚቴ አቋቁሜ በስውር ያገኘሁት ስጦታ እንደሌለ ማንኛውም ዜጋ እና ኢትዮጵያዊ ሊያውቀው ይገባል። ለዚህም በእጄ ያሉት ልዩ ልዩ የጽሑፍም ሆነ የድምጽ ወይም የምስል ማስረጃዎች እውነታውን ያረጋግጣሉ።

 

·          ባስተዳደርኩባቸው ሶስት አድባራት ችግር ፈጥረዋል የተባለውን በተመለከተ

1.  ሳገለግል በነበርኩበት ሶስቱም አድባራት ላይ ጥፋት ፈፅመሀል ተብዬ በተገልጋዩ ምዕመናን በወቅቱ የቀረበብኝ ክስ የለም።

2.  ባገለገልኩባቸው ቦታዎች ከመወቀስ ይልቅ ተመስግኜ ለምን ይዛወሩብናል በሚል ምዕመኑ ዝውውሩን ከመቃወማቸውም በላይ የቤተክስቲያኒቷ ልሳን በሆነው በኖህተ ጥበብ መጽሔት ቅጽ 1 ቁጥር 3 ላይ በምሳሌነት ለሌሎቹ አስተዳደሪዎች የኔን ፈለግ እንዲከተሉ ተመዝግቦ በሰፊው ይገኛል።

3.  በሶስቱም አድባራት ስዛወር ጥፋት ፈጽመሀል ተብዬ ሳይሆን የተለመደውን መንፈሳዊና የልማት ስራ እንድሰራ የሚል መሆኑን በቅዱስ ፓትርያርኩ ተፈርሞ የደረሰኝ የዝውውር ደብደቤ ያስረዳል።

·         ፀበል ቤት ለጋራዥ አከራይተዋል የተባለውን በተመለከተ

1.  በጋዜጣም ላይ እንደተገለጸው የቤተ ክርስቲያኗን መሬት አሳልፎ ለመስጠት የተፈጸመ ሳይሆን በደብሩ ሰበካ ጉባኤ ውሳኔ መሰረት የተሻለና ለምዕመኑ ምቹ የሆነ የፀበል ቦታ ለማዘጋጀት የተፈፀመ ነው። ምክንያቱም በተፈጥሮ የፈለቀው ፀበል የተሻለ አገልግሎት እንዲሰጥ ተደረገ እንጂ የነበረው ጸበል አልተዘጋም። ይህንንም በቦታው በመገኘት ማረጋገጥ ይቻላል።

·         የኪራዩን ውል የቤተክርስቲያኗን መብት በሚጎዳ ተዋውለዋል የሚለውን በተመለከተ

እኔ የብሔረጽጌ ማርያም ቤተክርስቲያን አስተዳዳሪ ከመሆኔ በፊት የነበረው የጋራዥ ኪራይ ዋጋ በወር ብር 3,000.00 ሲሆን እኔ ግን ከተመደብኩ በኋላ ሁሉንም በመመልከት የቤተክርስቲያኗን ጥቅም የሚጎዳ ሆኖ ስላገኘሁት ጉዳዩን ለሰበካ ጉባኤ አቅርቤአለሁ። ጉባኤውም ተወያይቶ አነስተኛ ዋጋ የተከራየ መሆኑን በማመን የወር ኪራይ ዋጋ ብር 35,000.00 እንዲሆን በውሳኔ ተደርጓል። ይህንንም ከእኔ በፊት የነበረውንና ከእኔ በኋላ ያለውን የኪራይ ውል በመመልከት ማረጋገጥ ይቻላል። ሱቆቹንም በተመለከተ ማረጋገጥ ይቻላል። ሱቆቹንም በተመለከተ እኔ የደብሩ አስተዳዳሪ ከመሆኔ በፊት በየወሩ ለዘመናት ከብር 3,000.00 – 6,000.00 ድረስ ሲከራይ የነበረውን እና ለ3ኛ ወገን ያከራይ ተከራይ በሚል ያለ አግባብ ሲጠቀሙበት የነበረውን በሰበካ ጉባኤ በማስወሰን በወር አንዱን ሱቅ በብር 1400.00 እንዲከራይ በማድረግ የቤተክርስቲኗን ጥቅም በተሻለ ሁኔታ አስጠበቅኩ እንጂ እንደተባለው ቤተክርስቲያኗን የሚጎዳ ድርጊት አልፈፀምኩም።

 

·         አሁን የፍ/ቤት ውሳኔ እንዳይፈጠም አድርገዋል የሚለውን በተመለከተ

በመሰረቱ ሊፈፀም የሚችል የፍ/ቤት ውሳኔ ሳይሆን በሰበር ችሎት በክርክር ላይ የነበረውን ጉዳይ በደብሩ ሰበካ ጉባኤና በልማት ኮሚቴው ውሳኔ ግለሰቡ ያቀረበውን ይቅርታ መነሻ በማድረግ ከላይ በተገፀው መሰረት የኪራይ ውሉን በወር ከ3,000.00  ወደ 35,000.00 ብር ከፍ እንዲል ተደርጓል። ተከራዩ የተከራይ አከራይ በሚል ለ3ኛ ወገን አከራይተው ይጠቀም የነበረውን በቀጥታ ከቤተክርስቲያኗ ጋር ውል እንዲፈርሙ በማድረግ ብር 24,000.00 በወር እንዲከፈል ተደርጓል። በመሆኑም እኔ የፈፀምኩት አንድ ግለሰብ ግቢውን ተከራይቶ በወር ብር 3,000.00 ሲከፍል የነበረውን አግባብ እንዳልሆነ ተረድቼ በወር ብር 59,000.00 ቤተክርስቲያኗ ገቢ እንድታገኝ ማድረጌ ጉዳት ከሆነ ለፈራጅ ህሊና ትቼዋሁ።

·         አሁን የፍ/ቤት ውሳኔ እንዳይፈጸም አድርገዋል የሚለውን በተመለከተ

ዝውውር መፈፀም የእኔ የስራ ድርሻ አይደለም። በመሆኑም የፈፀምኩት ዝውውር የለም። ዝውውር የመፈፀም ስልጣንና ኃላፊነት የሀገረ ስብከቱ ጽ/ቤት ድርሻ ነው።

 

·         አገልጋይን በዘረኝነት ለያይተዋል፣ ከፋፍለዋል የተባለውን በተመለከተ

በአሁኑ ወቅት እያንዳንዱ ኢትዮጵያዊ ዜጋ ዘርን፣ ኃይማኖትን ሳይለይ ተከባብሮ በሚኖርበት ዘመን እንዲህ ዓይነት አስጸያፊና አስነዋሪ ቃል ከአንድ ኃይማኖታዊ አባት ተነግሯል ተብሎ መገለፁ አሳዛኝ ነው። እኔ መከባበርና መቻቻልን፣ አንድነትን፣ በኃይማኖት መጽናትን የምሰብክ እንጂ እንደተባለው እንዲህ አይነት አስጸያፊ ተግባር እንደማልፈጽም የሚያውቁኝ የኢትዮጵያ ህዝብ ምስክር ነው። ምናልባትም ይህ አገላለጽ የተሰጠኝ በራሳቸው ውስጥ ያለውን ስሜት እንደሆነ እገነዘባለሁ። በጋዜጣው አምድ ላይ ያወጣው ጋዜጠኛም ቢሆን ይህንን አደገኛና አስጸያፊ ተግባር መፈጸሜን ሳያረጋግጥ አየር ላይ ማዋሉ ከሞያ ስነ ምግባር ውጪ ነው።

 

·         በሀሰት ራሳቸውን ጥይት በመተኮስ መብረቅ ወረደና ከመብረቁ ጋር ታቦት ከሰማይ ጋር ወረደ በማለት የማታለል ተግባር ፈጽመዋል የተባለውን በተመለከተ

1.  በመሰረቱ ሰላም በሰፈነበት በአዲስ አበባ ከተማ አንድ የኃይማኖት አባት በቤተክርስቲያን ግቢ ውስጥ ይተኩሳል የሚለው አባባል ፈፅሞ ከእውነት የራቀ እና ሊታመን የሚችል አይደለም። እኔ ከመስቀል ባሻገር ጥይትም ሆነ መሳሪያ ለመሸከም ህሊናዬም ሆነ ኃይማኖቴ አይፈቅድም። ምናልባትም ይህንን ኃጢአት የሚያሸክሙኝ ግለሰቦች ጥይቱንና መሳሪያውን ሊሸከሙ የሚችሉ ሳይሆኑ አይቀሩም ብዬ እገምታለሁ።

2.  እውነታው ግን በኮልፌ ደብረ ብርሃን ሥላሴ ቤተ ክርስቲያን ፅላት ተገኝቷል መገኘቱንም በወቅቱ ለነበሩት የሀገረ ስብከቱ ሊቀ ጳጳስ አሳውቄ በልደታ ጋዜጣ ላይ መግለጫ ሰጥቻለሁ። ሊቀ ጳጳሱም በቦታው ተገኝተው ባርከዋል። የሀገረ ስብከቱ የህትመትና ስርጭት ክፍል ኃላፊዎችም በቦታው ተገኝተው አረጋግጠዋል። ታቦተ ህጉም በአሁኑ ሰዓት በቦታው ላይ እየከበረ ይገኛል።

·         በተደጋጋሚ ማስጠንቀቂያ ተሰጥቷቸዋል የሚለውን በተመለከተ

1.  በመሠረቱ በተደጋጋሚ የተሰጠኝ ማስጠንቀቂያ ሳይሆን ስለመኖሩም ለጋዜጠኛው ሳይቀርብለትና ሳያረጋግጥ ተደጋጋሚ ማስጠንቀቂያ ተሰጥቷቸዋል ማለቱ ከስነ ምግባር ውጪ ነው።

2.  ተሰጠ የተባለውን ማስጠንቀቂያ በ1999 ዓ.ም የዛሬ 10 ዓመት የተፃፈ ሲሆን ለእገዳና ለስንብት ምክንያት የሆነውን እንደ አዲስ የተጠቀሰው በዚሁ ከዛሬ 10 ዓመት በፊት ተሰጠ የተባለው ማስጠንቀቂያ ላይ የተጠቀሰና በወቅቱ በ1999 ዓ.ም መፍትሄ ያገኘ ጉዳይ ነው። ምክንያቶቹ እውነትነት የሌላቸው ከግል ጥላቻ የመነጩ ናቸው።

ስለሆነም ሀሳቤን ለማጠቃለል የጋዜጣው ባለቤትም ሆነ ለኢትዮጵያ ኦርቶዶክስ ተዋህዶ እምነት ተከታዮች ማስገንዘብ የምፈልገው እኔ የታገድኩት እና ለዚህ ሁሉ ችግር /እንግልት እንድበቃ የተደረገኩበት ዋናው ምክንያት፡-

1.  በደብረ ሰላም ቅዱስ እስጢፋኖስ ቤተክርስቲያን እያስተዳደርኩ ባለሁበት ወቅት የሀይማኖት እጸጽ እንዳለባቸው በማስረጃ የተረጋገጠባቸው መሆኑን እና ጥፋታቸውን አምነው ይቅርታ የጠየቁ ሁለት አገልጋዮችን በማህበረ ካህናቱ እና፣ በሰበካ ጉባኤው ውሳኔ የታገዱትን ወደ ስራ መልስ በሚል የአምባገነን አስተዳደር አስገዳጅ ትዕዛዝ ለምን አልፈጸምክም በሚል፤

2.  ለቤተ ክርስቲያኗ ልማታዊ እድገት የደብሩ ማህበር ካህናት እና ምዕመናንን በማስተባበር የተሰራውን ልማት ለማደናቀፍ በማሰብ፣

3.  ከላይ እስከ እታች ድረስ በግል እና በቡድን የተደራጁ ግለሰቦች የሚፈጽሙትን ፍትሃዊነት የጎደለው አሰራር እና ሙስና እንዲሁም ያለ አግባብ ጥቅም መፈለግን በጽኑ ስለምቃወም፤

4.  ደብሩ ክፍት ቦታ እና በጀት ሳይኖረው ሰበካ ጉባኤው ጥያቄ ሳይቀርብ የተለያዩ ግለሰቦችን ለመጥቀም ሲባል ብቻ ደመወዝ በመጨመር፣ ሠራተኛ በመቅጠር፣ እንድንቀበል በየጊዜው የሚጻፍብኝን ትዕዛዝ በመቃወም፣

5.  ወጥቼ ወርጄ ራሴ ካለማሁት እና ገቢውን ካሳደኩት እንዲሁም በካህናት እና ምዕመናን ዘንድ ተወዳጅነት ካተረፍኩበት ደብረ ያለ ምንም በቂ ምክንያት በማንሳት ወርሃዊ ደመወዝ ወደማይከፈልበት እና ምንም አይነት የልማት እንቅስቃሴ ወደሌለበት ቦታ መዛወሬን ያየ እና የተመለከተ ሁሉ ጉድ እስከሚል ድረስ የተሰራውን ወይም የተፈጸመውን ኢ-ፍትሃዊ አሰራር መቃወሜ እና በሚመለከተው አካል ጩኸት በማሰማቴ የተደረገ እገዳ እንጂ ለመታገዴ እና ይህ ሁሉ ግፍ እና በደል እንዲደርስብኝ የተደረገ ተግባር እንጂ ይህ ነው የሚባል አንድም በማስረጃ የተደገፈ ጥፋት የሌለ ከመሆኑም ባሻገር እንዲያውም መናፍቃንን ወደ ቅድስት ቤተክርስቲያን ሰርገው እንዳይገቡ ለመከላከል እና እንደ ብረት አጥር በመቆሜ ልሸለም ሲገባኝ መልካም ስሜንና አርአያ ክህነቴን እንዲሁም ከኦርቶዶክሳዊት ኃዋርያዊት ጥንታዊት ታሪካዊት ቤተክርስቲያንን ክብርን ልዕልና ያዋረደውን ጋዜጣው ፍትሃዊነት የጎደለው አኳኋን የአንድን ወገን ብቻ ተቀብሎ ለህዝብ ለንባብ ያበቃውን ጽሁፍ ያለ ምንም ቅድመ ሁኔታ እንዲያስተባብል ስል እጠይቃለሁ። በተጨማሪም የሃይማኖት ህጸጽ በተጨባጭ ማስረጃ የተገኘባቸውን ሠራተኞች አስተዳደራዊ እርምጃ ወስደው ለሚመለከተው አካል ማሳወቁ የኃይማኖት ህፀፅአለበት የሚያስብል ከሆነ ፍርዱን ለአንባቢ ሰጥቼዋለሁ። እንዲሁም የስነ ምግባርና አሉ የተባሉ ችግሮች በሙሉ እኔን የማይወክሉ መሆናቸውንና ማስረጃ የሌላቸው መሆኑን መግለጽ እፈልጋለሁ።

ይምረጡ
(0 ሰዎች መርጠዋል)
47 ጊዜ ተነበዋል

Sendek Newspaper

Bole sub city behind Atlas hotel

Contact us