ለምን ብቸኛ ሆኑ?

Thursday, 06 November 2014 09:24

     አንዳንድ ሰዎች መርጠው ብቸኛ ሊሆኑ ይችላሉ። በሌላ በኩል አንዳንድ ሰዎች ደግሞ ቅርብ ጊዜ ከጥሩ የፍቅር ግንኙነት ውስጥ በመውጣታቸው ምክንያት እና የሚመስላቸውን ሰው እስከሚያገኙ ድረስ ብቸኛ ሊሆኑ ይችላሉ። የዚህ ፅሁፍ ዓላማ ብቸኛ ሆኑ ወንዶችን እና ሴቶችን ብቸኛ ልትሆኑ የቻላችሁት በዚህ በዚህ ምክንያት ነው ማለት አይደለም። ይልቁንም እድሜያችሁ ከ30 በላይ የሆነ እንደሆን እንዴት እስከ ዛሬ ድረስ ብቸኛ ልሆን ቻልኩ ለሚለው ጥያቄ እንቆቅልሽ ለሆነባችሁ ለጥያቄያችሁ መልስ ሊሆኑ የሚችሉ ውስጣችሁ የሚገኙ ያልተለመዱ ምላሾችን ለማቀበል ነው።
     ከተቃራኚ ፆታ ፍቅር ግንኙነት ጋር በተያያዘ የትኛውም ሰው ቢሆን እንደው አንድም ጊዜ እንኳ ተጎድቼ አላውቅም ለማለት ይቸገራል። የሆነ ጊዜ ላይ ሰዎች መራራት ሊሳናቸው፣ ራስ ወዳድ ሊሆኑ እና ልትጎዱ ትችላላችሁ። በዚህ ወቅት ታዲያ “የእኔ ጥፋት ነው” የሚል ድምዳሜ ላይ መድረስ ትክክል አይደለም። የሆነ ሆኖ ግን እውነታው ምንድን ነው? አብዛኞቻችን ከምናስበው በላይ የፍቅር ሕይወታችን ላይ የቁጥጥር ኃይል አለን። ምንም እንኳ ብዙ ጊዜ ብንዘነጋውም ሁላችንም አውቀንም ይሁን ሳናውቅ የምንኖርበትን ዓለም እንፈጥራለን። ራሳችንን ሁልጊዜ በተጎጂ መነፅር ለመመልከት አልያም እቅድ ያለው እና የገዛ ሕይወቱን እጣ ፈንታ መቆጣጠር የሚችል ሰው በሚል መነፅር ራሳችንን ለመመልከት መምረጥ እንችላለን። መቆጣጠር የማንችለው ነገር ላይ ሳይሆን መቆጣጠር የምንችለው ነገር ላይ ትኩረት ብናደርግ የተሻለ ተጠቃሚ እንሆናለን። ሰዎች ስለእኛ የሚሰማቸውን ስሜት መወሰን የምንችልበት አቅም አለን። ይህ አቅም ታዲያ አሉታዊ ስሜቶችንም ይጨምራል። ስለዚህ ብቸኛ የሆነና እና የፍቅር አጋር በመፈለግ ላይ የሚገኝ ሰው ለራሱ ሊያቀርበው የሚገባው ጥያቄ “ብቸኛ ልሆን የቻልኩበት ምክንያት ምንድን ነው?” የሚል ነው።
1. ማስተባበያዎች
     ብዙ ሰዎች ከሌሎች ሰዎች ጋር ባላቸው ግንኙነት ተጎድተው ያውቃሉ። በዚህ ምክንያት መሽቶ በነጋ ቁጥር ውስጣችን ቅያሜ፣ ቁጣ እና ጥርጣሬ ያሳድጋል። በዚህ ምክንያት ከሰዎች ጋር ባለን ግንኙነት ውስጥ ማስተባበያዎች ያለልክ እንጠቀማለን። ይህ ሂደት የሚጀምረው በልጅነታችን ሊሆን ይችላል። በተለያየ አጋጣሚ ሰዎች ስሜታችንን በመጉዳታቸው የተነሳ ራሳችንን ከጉዳት ለመከላከል ያስችላል ብለን ያሰብነውን በተለይ ነፍስ ካወቅን በኋላ ሕይወታችን አሉታዊ በሆነ መንገድ ሊጫን የሚችል ዓለምን የምንመለከትበት፣ ክፉ እና ደግ ነው የምንለውን ነገር የምንለይበት ማጣሪያ እናዘጋጃለን። እነዚህ ማጣሪያዎች ከልክ በላይ ራሳችንን ከጉዳት ለመከላከል ብቻ የምንተጋ፣ የትኛውንም ግንኙነት ለማስወገድ የምንተጋ፣ ለማፍቀር ሳይሆን ለአለመጎዳት የምንሰራ ሰዎች ሊያደርጉን ይችላል። ይህ ጠባይ በአዋቂነት ዘመናችን ራሳችንን አሳልፈን ከመስጠት እንድንቆጠብ እና በቀላሉ በሰዎች ተስፋ የምንቆርጥ አይነት ሊያደርገን ይችላል።
     ለምሳሌ ፍቅር ተነፍጋችሁ ከሆነ ያደጋችሁት አዋቂ ስትሆኑ ሰዎች ፍቅራቸውን ሊገልፁላችሁ ሲሞክሩ ተጠራጣሪ ልትሆኑ ትችላላችሁ። እንደውም በምትኩ የልጅነት ሕይወታችሁን መልሶ የሚደግም አይነት ፍቅር የሌለበት በቅናት፣ ጥርጣሬ እና ጥል የተሞላ ግንኙነት ልትመሰርቱ ሁሉ ትችላላችሁ። እንደ አሳዳጊያችሁ ፍቅር መስጠት የማይችል ሰው ልታፈቀሩ ትችላላችሁ። ይሁን እንጂ ብቸኛ ልንሆን የቻልነው በዚህ እና በዚያ ምክንያት ነው እያልን ውጫዊ ነገሮችን ብቻ በመውቀስ ውሳጣችን የሚገኙ ምክንያቶችን ሳንመለከት እንቀራለን።
2. ጤናማ ያልሆነ መሳሳብ
     ቀደም ሲል ያነሳነው አይነት ማስተባበያ ውስጣችን ከኖረ አጋር ስንመርጥ የምንፈልገው ዓይነት ሰው ላንመርጥ እንችላለን። ይልቁንም እምብዛም ፍቅር የማይሰጠን እና በስሜት ሩቅ የሆነ ሰው ላይ እናተኩራለን። ይህ ሂደት በአመዛኙ ለእኛ የሚታይ ባለመሆኑ አልሰራ ላለው ግንኙነት ተወቃሽ የምናደርገው አጋራችንን ብቻ ይሆናል። እነዚህን መሰል ግንኙነቶች እየመሰረትን የምንገኘው በገዛ እጃችን መሆኑን መመለከት ስለሚከብደን በተደጋጋሚ በሚያጋጥመን መገፋት እንጎዳለን።
     ለምንድን ነው እንዲህ የምናደርገው? ምክንያቶቹ ብዙ ጊዜ የተወሳሰቡ ሲሆን መሠረት የሚያደርጉት ውስጣችን በጥልቀት የተቀበረ ጥልቅ ወዳጅነትን የመፍራት አባዜ ላይ ነው። ብዙ ሰዎች ለእነሱ ያን ያህል ጎልቶ የማይታይ ነገር ግን በራሳቸው ዙሪያ ቀደም ሲል ያስቡ የነበሩትን ቁልፍ አስተሳሰቦች የሚያጠናክር ግንኙነት የመሳብ ተነሳሽነት ውስጣቸው አለ። በዚህ ምክንያት የልጅነታቸውን አሉታዊ ገፅታዎች መልሰው በአዋቂነታቸውም ዘመን ይደግሙታል። ምንም እንኳን አስፈሪ ቢሆንም ከአረጁ አስተሳሰቦች ጋር ፍቺ በመፈፀም ውስጣችን ፍርሀት ሊፈጥር እና ብዙ የሚወዱን ሰዎች በዙሪያችን በተሰበሰቡበት ሁኔታ ውስጥ እንኳ ልክ የለሽ ብቸኝነት እንዲሰማን ሊያደርግ ይችላል።
3. መቀራረብን መፍራት
     ብዙዎቻችን አፍቃሪ አጋር እንደምንፈልግ እንናገራለን። ይሁን እንጂ እውነተኛ ፍቅር ወደ ሕይወታችን ሲመጣ ያ ከልጅነት ጅምሮ ውስጣችን ያደገውን የፍቅር ቅዠት አልመስል ስለሚለል ልባችንን አንከፍትም።
     ቅርርብን መፍራት ከሚገለፅባቸው መንገዶች አንዱ አንድ ሰው “ከልክ በላይ ነው የሚወደኝ፤ ከእሱ/እሷጋር መሆን ይከብደኛል” የሚል ማስተባበያ ነው። ይህ ምክንያት ከአንድ ሰው ጋር የፍቅር ግንኙነት ለአለመመስረት ጨርሶ ምክንያት ሊሆን አይችልም። ይልቁንም የሚወድንን ሰው በማብጠልጠል እና በመግፋት አጣን የምንለውን ፍቅር እውነትም እንዳጣን ለማረጋገጥ እንሞክራለን። እውነቱን ለመናገር ብዙ ሰዎች የሚመርጡት በተወሰነ መልኩ መቀራረብን ብቻ ነው። ምንም እንኳ የፍቅር አጋር እንደምንፈልግ ብንገልፅም ውስጣችንን ግን በዚህ መልኩ ልንዘጋው እንችላለን። ነገሩን በጥልቀት ስትመለከቱት እንፈልጋለን እንላለን እንጂ አንፈልግ ይሆናል።
4. መራጭ መሆን
     ማስተባበያዎችን ብዙ ጊዜ አለልክ መራጭ ያደርጉናል። ይህ በተለይ እውነት የሚሆነው በአንድ አጋጣሚ በጣም በምንወደሰው ሰው የተከዳን አልያም ደግሞ የተገፋን እንደሆነ ነው። ብዙ ሴቶች “ጥሩ ወንድ እኮ የለም፤ ያሉት ጥቂቶችም ተይዘዋል” ሲሉ ይደመጣል። ወንደች በሌላ በኩል “ሴቶችን ማመን አይቻልም፤ ተጠቅመውብህ ዞር ይላሉ” ሲሉ ይደመጣል። እውነታን ያላገናዘበ ነገረ ከሰዎች እንጠብቅና ገና ከመገናኘታችን “አይ ይሄ/ይቺ እንኳን ሊሆን/ልትሆን አትችልም” የሚል ድምዳሜ ላይ እንደርሳለን። በአብጠልጣይ አይን ዓለምን የምንመለከት ከሆነ ወደፊት አብረውን ሲሆኑ አስደሳች ሕይወት ለመምራት ሊረዱን ሁሉ የሚችሉ ብዙ ሰዎችን እናጣለን። ወደፊት ያ ሰው ምን ያህል ሊያስደስትን እንደሚችል ሳናውቅ ተስፋ እንቆርጣለን።


5. ዝቅተኛ በራስ የመተማመን ስሜት
     አንዳንድ ሰዎች የፍቅር አጋር እንደሚፈልጉ ከልባቸው ያምናሉ። ይሁን እንጂ ከዚህ በበለጠ መልኩ የሚፈልጉት አይነት ሰው እነሱን እንደማይፈልጋቸው ያምናሉ። ሁላችንም ውስጣችን በጣም ወፍራም፣ መልከ ጥፉ፣ ልዩ እንደሆንን የሚነግረን ድምፅ ይኖር ይሆናል። በዚህ ምክንያት ሰዎችን የሚያርቅ ነገር እናደርጋለን። አንዳንድ ሰዎች ዝቅተኛ በራስ መተማመን ውስጣቸው ሲነግስ ሌላው ቀርቶ ከቤት መውጣት ሁሉ ሊያስጠላቸው ይችላል። አይን ለአይን መተያየት ይከብዳቸዋል። በአንድ አጋጣሚ ሊወዱት ከሚችሉት ሰው ጋር ቢተዋወቁ እንኳ “ልትፈልገኝ ትችላለች/ሊፈልገኝ ይችላል” ብለው ስለማያስቡ ፍላጎታቸውን አይገልፁም ይልቁንም ሽሽት ውስጥ ይገባሉ።
6. ውድድርን መፍራት
     ዝቅተኛ በራስ መተማመን ውድድር እንድንፈራ ያደርጋል። በተለይ ከተቃራኒ ፆታ ግንኙነት ጋር በተያያዘ ራሳችንን ከሌሎች ጋር አወዳድሮ ዝቅ ዝቅ ማድረግ በጣም ቀላል ነው። እኛ ፍላጎት ያሳደርንበት ሰው ላይ ሌላ ሰው ፍላጎት እንዳሳደረ ስናውቅ እግሬ አውጪኝ ብለን እንሸሻለን። በተለይ እድሜያችን እየገፋ ሲሄድና ሰዎች “ቆመህ መቅረትህ/መቅረትሽ ነው” የሚል ትችት መሰንዘር ሲጀምሩ የመፎካከር መንፈስ ከውስጣችን ሙልጭ ብሎ ሊጠፍ ይችላል። መፎካከርን የምንፈራ ከሆነ ወጣ ብለን የሚመስለንን ሰው ለማግኘት ሙከራ አናደርግም። አንዳንዴ መሸነፍን ብቻ ሳይሆን ማሸነፍን ሁሉ እንፈራለን። እኛ አሸንፈን ልባችን የፈቀደውን ሰው ብናገኝ ሌላኛው ሰው ሊጎዳ ይችላል የሚል ፍርሀት ውስጣችን ይነግሳል። ቀላሉ እውነታ ግን ምንድን ነው የፍቅር አጋርን ማግኘት ፉክክር የሚጠይቅ ነገር ነው።
7. መገለል እና ልማድ
     በተለይ እድሜ እየገፋ ሲመጣ ሰዎች የለመዱት ነገር ውስጥ ከልክ በላይ የመወሸቅ ፀባያቸው እየጨመረ ይመጣል። ዘመናዊ ሴቶች በብዙ መልኩ ስኬታማ ናቸው። ይህ ጥሩ ነገር ነው። ይሁን እንጂ ዘመናዊ ወንዶች እና ሴቶች በሀብትም ይሁን በሌላ መልኩ ሲደላደሉ አንዳንዴ ከምቾት መጋረጃቸው ውስጥ ወጥተው ሰዎችን ለመተዋወቅም ሆነ ለመቀራራብ ይችገራሉ። አደጋን ለመግፋት እና ራሳቸውን አሳልፈው ለመስጠት ሊቸገሩ ይችላሉ። ከረጅም የስራ ቀን በኋላ ብዙዎቻችን ወደቤታችን አምርተን ቢጃማ ለብሰን እረፍት ማድረግ እንጂ ወጣ ብሎ ሊያስፈራ የሚችለውን ሰዎችን የመተዋወቅ እና መቀራረብ ተግባር አንመርጥም።  
     ቤት እንድንሄድ የሚያበረታታን አንድም ውስጣችን የሚገኘው ያ ድምፅ ሊሆን ይችላል። “ግድ የለም ብቻችሁን ብትሆኑ ይሻላል”፣ “ምን ጎደለባችሁ”፣ “እንደውም ልብስ ቀያይራችሁ ያንን የቴሌቪዥን መርሀግብር ብትከታተሉ ይሻላል” ወዘተ ሊለን ይችላል። ይሁን እንጂ ይሄው ድምፅ ኋላ መልሶ “ምን ነካችሁ! አድሜያችሁ እኮ ሄደ”፣ “ቆማችሁ መቅረታችሁ ነው”፣ “ብቻችሁን መሞታችሁ ነው” ብሎ ሊረብሸን ይችላል። ስለዚህ እንደዚህ አይነት ልማድ ውስጥ ሰጥመን እንዳንቀር ወጣ ብሎ ሰዎች መተዋወቅ፣ የፍቅር አጋር እየፈለግን እንደሆነ ለጓደኞቻችን መናገር ወዘተ… አስፈላጊ ነው።
8. ህግ ማውጣት
    ጊዜያቶች ሲሄዱ የተቃራኒ ፆታ ግንኙነትን የሚመለከቱ ህግች ለራሳችን እናዘጋጃለን። በዚህ መሠረት በጎ ነው ብለን የምናስበውን ወቀረት ላይ እናሰፍራለን። ይሁን እንጂ ወረቀት ላይ ያማረ ነገር መሬት ላይ ሲወርድ ላያምር ይችላል። ያለፈ ግንኙነታችንን መሰረት ያደረግ ህግ አውጥተን ለመኖር ስንሞከር አሳዛኝ አጋጣሚዎች ሊደጋገሙብን ይችላል። አንዳንድ ጊዜ አንዳንድ ሰዎች ያማረ የሚሉት የፍቅር ሕይወታቸው ሲፈርስ ከዛ በኋላ “ከዚህ በኋላ ከምወደው ሰው ጋር አብሬ መሆን የለብኝም” የሚል ድምዳሜ ላይ ይደርሳሉ። በዚህ መሠረት ያን ያህል ከማይወዱት ሰው ጋር ፍቅር ለመመስረት የሚደርጉት ጥረት መጨረሻው ደስታ አልባ እየሆነ ይቸገራሉ።
     የፍቅር አጋር በምንፈልግበት ወቅት ልናደርግ የሚገባው ትልቁ ነገር ዝግጁ መሆን ነው። እውነት ነው አንዳንዴ በዚህ ምክንያት ልንጎዳ እንችላለን። ነገር ግን ላለመጎዳት ብቻ ዝግ ስንሆን ደግሞ በአንጻሩ ወደፊት አብሮን ሊሆን የሚችልን ሰው ልናጣም እንችላለን።
     የፍቅር አጋርን ማግኘት አልጋ በአልጋ የሆነ ጉዞ አይደለም። የሆነ ሆኖ ግን ሁልጊዜም በእኛ በኩል ያለውን ኃላፊነት መወጣት አስፈላጊ ነው። ወደኋላ የሚጎትቱንን ውስጣችን የሚገኙ ልማዶች መዋጋት ያስፈልጋል። ራሳችንን እንዴትም ቢሆን ፍፁም ከአደጋ መከላከል አንችልም። ሁላችንም ደካማ ጎን ያለን ሲሆን እነዚህ ጎኖች ደግሞ በተለይ ሌላ ሰው እየቀረብን ስንሄድ እየጎሉ ይሄዳሉ። ስለዚህ ጥልቅ የፍቅር ወዳጅነት መመስረት ትልቅ ጥረት የሚጠይቅ ሲሆን ስኬቱም አስደሳች እና “እንኳንም ደከምኩ” የሚያሰኝ በመሆኑ ውስጣችን የሚገኙ ጎታች አስተሳሰቦችን፣ ፍርሀቶችን፣ ልማዶችን መታገል ያስፈልጋል።
     አንዳንድ ሰዎች መርጠው ብቸኛ ሊሆኑ ይችላሉ። በሌላ በኩል አንዳንድ ሰዎች ደግሞ ቅርብ ጊዜ ከጥሩ የፍቅር ግንኙነት ውስጥ በመውጣታቸው ምክንያት እና የሚመስላቸውን ሰው እስከሚያገኙ ድረስ ብቸኛ ሊሆኑ ይችላሉ። የዚህ ፅሁፍ ዓላማ ብቸኛ ሆኑ ወንዶችን እና ሴቶችን ብቸኛ ልትሆኑ የቻላችሁት በዚህ በዚህ ምክንያት ነው ማለት አይደለም። ይልቁንም እድሜያችሁ ከ30 በላይ የሆነ እንደሆን እንዴት እስከ ዛሬ ድረስ ብቸኛ ልሆን ቻልኩ ለሚለው ጥያቄ እንቆቅልሽ ለሆነባችሁ ለጥያቄያችሁ መልስ ሊሆኑ የሚችሉ ውስጣችሁ የሚገኙ ያልተለመዱ ምላሾችን ለማቀበል ነው።

 

ይምረጡ
(12 ሰዎች መርጠዋል)
3903 ጊዜ ተነበዋል

Sendek Newspaper

Bole sub city behind Atlas hotel

Contact us