ለሥራ አዎንታዊ አመለካከት ይኑርህ

Wednesday, 10 December 2014 13:51

     የምትሠራው ሥራ የአእምሮ ሥራ ወይም የጉልበት ሥራ አሊያም ደግሞ ሁለቱንም የሚያጠቃልል ሊሆን ይችላል፤ ይሁንና በየትኛውም የሥራ መስክ ቢሆን “ለፍተው የሠሩት ሁሉ ትርፍ እንደሚያስገኝ ማወቅ ያስፈልጋል። ጠንክረን መሥራታችን የሚያስፈልጉንን ቁሳዊ ነገሮች ለማሟላት ያስችለናል።

በመሆኑም ሥራ ግባችን ላይ እንድንደርስ የሚረዳን መሣሪያ ነው ሊባል ይችላል። ሥራ ኃላፊነታችንን በአግባቡ እንድንወጣ ያስችለናል። ራስህን መቻል ትልቅ ስኬት ነው። የሚያስፈልግህን ነገር መግዛት ከቻልክ ከሥራ ማግኘት ያለብህን ጥቅም እያገኘህ ነው ሊባል ይችላል።

ከዚህም በላይ ጠንክሮ መሥራት ለራሳችን አክብሮት እንዲኖረን ይረዳናል። ጠንክሮ መሥራት ድካምና ልፋት እንደሚጠይቅ ግልጽ ነው። ሥራችን አሰልቺ ወይም ከባድ ቢሆንም እንኳ ከራሳችን ጋር ታግለን በትጋት መሥራታችንን የምንቀጥል ከሆነ ግን የሚፈልግብንን ነገር እያደረግን እንደሆነ ስለምናውቅ የአእምሮ እርካታ እናገኛለን። ስለሆነም ሥራ ከፍተኛ እርካታ ያስገኝልናል።

በሥራህ ውጤታማ ሁን

አንድ ሰው ምንም ጥረት ሳያደርግ በሥራው ውጤታማ ሊሆን አይችልም። ደግሞም ብዙ ሰዎች በደንብ የማይችሉትን ሥራ ማከናወን አያስደስታቸውም። ምናልባትም ብዙዎች በሥራቸው የማይደሰቱት በሥራቸው ውጤታማ ለመሆን አስፈላጊውን ጥረት ስላላደረጉ ይሆናል።

እንደ እውነቱ ከሆነ አንድ ሰው ለሚሠራው ማንኛውም ሥራ ተገቢ አመለካከት ካለው ማለትም በሥራው ውጤታማ ለመሆን የሚጥር ከሆነ ከሥራው ደስታ ማግኘት ይችላል። አንድን ሥራ አቅምህ በፈቀደው ሁሉ ሠርተህ ውጤቱን ስትመለከት እርካታ ታገኛለህ። አቋራጭ መንገድ የምትፈልግ ወይም የሚጠበቅብህን ብቻ በማድረግ የምትወሰን ከሆነ ግን እንዲህ ዓይነት ስሜት አይኖርህም።በማለት የስነ ልቦና ባለሙያዎች ይመክራሉ።

ሥራህ ምን ጥቅም እንደሚያስገኝ አስብ

ከሥራህ ስለምታገኘው የገንዘብ መጠን ብቻ ከማሰብ ተቆጠብ። ከዚህ ይልቅ ራስህን እንደሚከተሉት ያሉትን ጥያቄዎች ጠይቅ፦ ‘ይህ ሥራ አስፈላጊ የሆነው ለምንድን ነው? ሥራው በትክክል ሳይሠራ ቢቀር ወይም ጭራሹኑ ባይሠራ ምን ሊፈጠር ይችላል? ሥራዬ ለሌሎች ጥቅም የሚያስገኘው እንዴት ነው?’

በተለይ በመጨረሻው ጥያቄ ላይ ማሰብ ጥሩ ነው፤ ምክንያቱም ከሥራችን የበለጠ እርካታ የምናገኘው ሥራው ሌሎችን እንዴት እንደሚጠቅማቸው ስንመለከት ነው። ደንበኞቻችንና አሠሪዎቻችን ከእኛ አገልግሎት በቀጥታ ተጠቃሚ እንደሚሆኑ የታወቀ ነው፤ ሆኖም ሥራችን ጥቅም የሚያስገኘው ለእነዚህ ሰዎች ብቻ አይደለም። የቤተሰባችን አባላትና ሌሎች እርዳታ የሚያስፈልጋቸው ሰዎችም እኛ ከምንሠራው ሥራ ጥቅም ያገኛሉ።

አንድ አባወራ የቤተሰቡ አባላት የሚያስፈልጋቸውን ለማቅረብ ጠንክሮ የሚሠራ ከሆነ ቢያንስ በሁለት መንገዶች ይጠቅማቸዋል። አንደኛ፣ ለኑሮ የሚያስፈልጓቸውን ቁሳዊ ነገሮች ማለትም ምግብ፣ ልብስና መጠለያ እንዲያገኙ ያደርጋል። ይህን በማድረግም ‘የራሱ ለሆኑት የሚያስፈልጋቸውን ነገር እንዲያቀርብ’ ተፈጥሮ የሰጠውን ኃላፊነት ይፈጽማል።

ሁለተኛ አንድ ታታሪ የቤተሰብ አስተዳዳሪ ጠንክሮ መሥራት ያለውን ጥቅም ለልጆቹ በተግባር ያስተምራል። “አንድ ሰው ጠንክሮ በመሥራት ረገድ ምሳሌ የሚሆን ሊሆን ይችላል። አንድ ሰው የእጅ ሙያ ኖሮት ሰዎችን የሚጠቅሙ ነገሮችን መሥራቱ ምን ያህል እርካታ እንደሚያስገኝለት ከእሱ መማር ይቻላል።

ለራሳችንና ለቤተሰባችን የሚያስፈልገውን ነገር ለማቅረብ ጠንክረን የምንሠራ ከሆነ እርዳታ የሚያስፈልጋቸውን ሌሎች ሰዎችም ለመርዳት የሚያስችል አቅም ይኖረናል። በመሆኑም ጠንካራ ሠራተኛ መሆን የሚያስገኘውን ደስታ እንድናጣጥም ያስችለናል።

የሚጠበቅብህን ብቻ በማድረግ አትወሰን

የሚጠበቅብህን ብቻ በመሥራት ከመወሰን ይልቅ ከሚጠበቅብህበላይማድረግ የምትችልባቸውን መንገዶች ፈልግ። ግብ አውጣ፤ ሥራህን ከበፊቱ በተሻለ ጥራት ወይም ቅልጥፍና ለማከናወን ጥረት አድርግ። ጥቃቅን ነገሮችን ሳይቀር በጥራት ለመሥራት ሞክር።

ከሚጠበቅብህ በላይ ለመሥራት የምትጥር ከሆነ ሥራህ ይበልጥ አስደሳች ይሆንልሃል። ምክንያቱም ሥራህበአንተቁጥጥር ሥር እንደሆነ ይሰማሃል። ተጨማሪ ነገር እያደረግክ ያለኸው ሌላ ሰው ስላስገደደህ ሳይሆን በራስህ ፍላጎት ነው። “የትጉ ሰዎች እጅ ገዢ ትሆናለች፤ ሥራ ፈት እጆች ግን ለባርነት ይዳረጋሉ” የሚለው ሀይማኖታዊ አስተምህሮት ጠቃሚ ሐሳብ ይሆናል። እርግጥ ነው፣ አንዳንድ ሰዎች አሁንም ቃል በቃል በባርነት ሥር ሊሆኑ ይችላሉ፤ ወይም ደግሞ የግዳጅ ሥራ ያከናውኑ ይሆናል። ይሁን እንጂ የሚጠበቅበትን ነገር ብቻ በማድረግ የሚወሰን ሰው ሁልጊዜ የሚያከናውነው ሌሎች የሚነግሩትን ብቻ ስለሆነ በባርነት ሥር እንዳለ ሊሰማው ይችላል።

በራሱፍላጎትተነሳስቶ ከሚጠበቅበት በላይ ለማድረግ ፈቃደኛ የሆነ ሰው ግን ሕይወቱ በራሱ ቁጥጥር ሥር እንደሆነ ይሰማዋል። ይህ ሰው የራሱ ጌታ ይሆናል ማለትነው።

ለሥራ ከልክ ያለፈ ቦታ አትስጥ

ጠንክሮ መሥራት ጥሩ እንደሆነ የታወቀ ነው፤ ሆኖም ሕይወት ማለት መሥራት ብቻ እንዳልሆነ ማስታወሳችን ጠቃሚ ነው። እርግጥ ነው በትጋት መሥራት እንዳለብን ይታወቃል። ይሁን እንጂ የሥራ ሱሰኛ መሆን አይበረታታም።“ብዙ በመልፋትና ነፋስን በማሳደድ ከሚገኝ ሁለት እፍኝ ይልቅ ጥቂት እረፍት በማድረግ የሚገኝ አንድ እፍኝ ይሻላል” የሚለው ጥቅስ የሚያስተላልፈው ፤ አንድ ሰው ሥራው ጊዜውንና ጉልበቱን ሙሉ በሙሉ የሚያሟጥጥበት ከሆነ በሥራው ውጤት የሚደሰትበት ጊዜ አይኖረውም። በመሆኑም ሥራው ‘ነፋስን የማሳደድ’ ያህል ትርጉም የለሽ ይሆንበታል እንደማለት ነው።

ሥራችንን በትጋት ማከናወን እንዳለብን የሚናገር ቢሆንም ‘ይበልጥ አስፈላጊ የሆኑትን ነገሮች ለይተን ማወቅ ይገባናል።

በህይወታችን ውስጥ ይበልጥ አስፈላጊ የሆኑት ነገሮች ምንድን ናቸው? ከእነዚህ ነገሮች መካከል ከቤተሰብና ከወዳጆች ጋር ጊዜ ማሳለፍ ይገኝበታል። ለቤተሰቦቻቸው ተገቢውን ቦታ የሚሰጡ ሰዎች ደስታ ያገኛሉ።

ከመረጃ መረብ ተወስዶ የተስተካከለ¾

ይምረጡ
(22 ሰዎች መርጠዋል)
3169 ጊዜ ተነበዋል

Sendek Newspaper

Bole sub city behind Atlas hotel

Contact us