የጥራት መንገድ

Wednesday, 31 August 2016 12:47

 

የመጽሐፉ ርዕስ፡-    “እነሆ መንገድ ለኢትዮጵያ...” 

ጸሐፊ፡-             ፕሮፌሰር ዳንኤል ቅጣው

አርታኢ፡-            አንዱዓለም አባተ

የመጽሐፉ ዓይነት፡-    ኢ- ልቦለድ

የወጣበት ጊዜ፡-       ሐምሌ 2008

የገጽ ብዛት፡-         188

የመሸጫ ዋጋ፡-       80.00 ብር

አስተያየት፡-          በፍሬው አበበ

 

“አቅጣጫው የተሳሳተ የተጣደፈ ሥራ ፍጻሜው ከንቱ ድካም ነው። /speed is irrelevant if you are going in the wrong direction/” የሚለውን የመሀተመ ጋንዲ ተጠቃሽ አባባል በማስቀደም መጽሐፋቸውን የሚጀምሩት ፕሮፌሰር ዳንኤል ቅጣው ላለፉት 36 ዓመታት በመምህር ያገለገሉ ምሁር ናቸው። በ1972 ዓ.ም ከአዲስአበባ ዩኒቨርሲቲ በሜካኒካል ኢንጂነሪንግ በመጀመሪያ ዲግሪ በመዓረግ የተመረቁ ሲሆን የማስተርስ ዲግሪያቸውን በ1997 ዓ.ም እና የዲክትሬት ዲግሪያቸውን ደግሞ በ1991 ዓ.ም ከጣሊያን ሀገር ከቱሪን ፖሊ ቴክኒክ ኢንዱስትሪያል ኢንጂነሪንግ አግኝተዋል። ፕሮፌሰር ዳንኤል በዚሁ ሙያቸው በአዲስአበባ ዩኒቨርሲቲ በመምህርነት በማገልገል ላይ ሲሆኑ በዘርፉ በዲክትሬት ደረጃ ትምህርት እንዲሰጥ ብዙ ከደከሙ ምሁራን መካከል ቀዳሚው ናቸው። በዘርፉ በተለያዩ የኃላፊነት እርከኖች ላይ ያገለገሉት ፕሮፌሰር ዳንኤል በርካታ የመማሪያ መጽሐፍትና ጹሑፎችን አበርክተዋል።

ፕሮፌሰር ዳንኤል “እነሆ መንገድ ለኢትዮጵያ...” በሚል ርዕስ ባቀረቡት መጽሐፍ ለሀገራቸውና ለወገናቸው ይጠቅማል ያሉትን በርካታ ጉዳዮችን የዳሰሱ ሲሆን በዋንኛነት ከሙያቸው ጋር በቀጥታ በሚገናኘው የጥራት ጉዳይ ላይ ሰፋ ያለ ዕውቀትና ክህሎታቸውን አካፍለውናል።

“Quality” የሚለውን የእንግሊዝኛ ቃል በቀጥታ ጥራት ብሎ ለመተርጎም አስቸጋሪ ነው የሚሉት ፕሮፌሰር ዳንኤል ጥራት በራሱ ፍልስፍና ነው ይሉናል። “የጥራት ፍልስፍና ከደንበኛው ጋር እጅና ጓንት የሆነ፣ እንደሰምና ወርቅ እርስበርሱ የተዋዋጠ፣ አንዱ በአንዱ ላይ የሚገለጥና የሚጎላ ነው። ደንበኛ ስንል ሰጭና ተቀባይ፣ ተናጋሪና አድማጭ፣ አድራጊና የሚደረግለት እንደማለት ነው። ጥራት ደንበኛው የሚፈልገውን ማድረግ ወይንም መስጠት ማለት ነው።.... በአጭሩ ጥራት ማለት የደንበኛን ፍላጎት ማርካት፣ ከሚፈለገው በላቀ ሁኔታ ማቅረብ ማለት ነው” በሚል ያስቀምጡታል።

ፕሮፌሰር ዳንኤል የጥራት ምሰሶዎች ሁለት መሆናቸውን በመጽሐፋቸው ይጠቅሳሉ። አንደኛው “ሥራን በመጀመሪያ ጊዜም ሆነ ሁልጊዜ በትክክል መሥራት (Do it right first time & every time)” ሲሆን ሌላኛው “ሁልጊዜ የተሻለ የአሠራር መንገድ አለ (There is always a better way of doing things)” የሚል ነው።

 

“ሥራን በመጀመሪያ ጊዜም ሆነ ሁልጊዜ በትክክል መሥራት”

. . . ሥራን ሁልጊዜም በትክክል ለመሥራት ደንበኛን ማወቅና በተገቢው ሁኔታ ማክበር እጅግ አስፈላጊ ነው። የደንበኛነት ሚዛኑ ከአገልግሎት ሰጪው እና ከአገልግሎት ተቀባዩ የጋራ መስተጋብር ጋር የተሳሰረ ነውና። ፕሮፌሰር ዳንኤል እንደአብነት ያነሱት ሰዎች በመጀመሪያ የግንኙነት ወቅት የሚኖር የአቀራረብ ሁኔታ ለቀጣይ ግንኙነታቸው ጥሩ መሆን/አለመሆን ወሳኝ መሆኑን፣ በመጀመሪያው ዕለት ጥፋት ከተገኘ እሱን ለማረም ጊዜ፣ ገንዘብ ጉልበት ወጪን ሊጠይቅ፣ ይህም ሆኖ ላይጠገን የሚችልበት ሁኔታ ሊያጋጥም እንደሚችል ያብራራሉ።

 

“ሁልጊዜ የተሻለ የአሠራር መንገድ ስለመኖሩ”

ዓለም የውድድር መድረክ ናት። እያንዳንዱ ቀን እና ሰዓት የተለየ መሻሻል፣ የተሻለ የሕይወት መስተጋብር መፈጠር ይኖርበታል። አጠቃላይ የዓለም ታሪክና ሥርዓትም የሚያሳየን ዛሬ ከትላንት በብዙ መልኩ መሻሻል እንዳለበትና እያንዳንዱ ሒደት ወይም እንቅስቃሴ በለውጥ ሒደት ውስጥ ኃላፊ ስለመሆኑ ማወቃችን ነው። በአገልግሎት አሰጣጥ ወይም በዕቃ አቅርቦት ረገድም ቀጣይነት ያለው የመሻሻል ዕድገት ዋንኛ እና ወሳኝ ጉዳይ ነው።እርካታ ደንበኛን የልብ ፍላጎት ማርካትና ከጠየቀው በላቀ ሁኔታ መስጠት እስከሆነ ድረስ ሁሌም መሻሻልና የተለየ ዕድገት መመዝገብ እንደሚኖርበት ፕሮፌሰሩ በመጽሐፋቸው ላይ አጽንኦት ሰጥተውታል።

 

ምርታማነት እና ብዙ ማምረት የአንድ ሳንቲም ሁለት ገጾች፣

ብዙውን ጊዜ ምርታማነት (Productivity) እና ብዙ ማምረትን አደባልቆ የማየት ነገር መኖሩን ፕሮፌሰር ዳንኤል ያስታውሱና ሁለቱ ጉዳዮች ግን የሚደበላለቁ አለመሆናቸውን፣ መሠረታዊ ልዩነት ያላቸው መሆኑን ያስቀምጣሉ። ብዙ ማምረት በራሱ ትልቅ ሥራ ቢሆንም ምርታማነት ማለት ግን አይደለም። እነዚህን ሁለት ጉዳዮች ለያይቶ ማየት ያስፈልጋል። በአንድ በኩል ምርታማነትና ምርት አብረው ያድጋሉ። በሌላ በኩል ደግሞ ምርታማነት እያደገ ምርት ላያድግ እንዲያውም ሊቀንስ የሚችልበት ሁኔታ ሊያጋጥም እንደሚችል ያስቀምጣሉ። ለአብነት ያህል አምስት ማሽኖች አንድ መቶ ዕቃዎችን በቀን ያመርታሉ እንበል። የተለያዩ የአሠራር ማሻሻያዎችን በማድረግ አንዱን ማሽን አሳርፈን በአራቱ ማሽኖች ብቻ ያንኑ አንድ መቶ ዕቃዎች ብናመርት ምርቱ ሳይጨምር ምርታማነት በ25 በመቶ አሳድገናል። እንዲያውም በአራቱ ማሽኖች በቀን ዘጠና ዕቃዎችን ብናመርት ምርቱ ቀንሶ ምርታማነት ግን ከ10 በመቶ በላይ አሳድገናል ማለት ነው።

 

ዲግሪ የያዘ ሁሉ የተማረ ላይሆን ይችላል፣

“ሙሉ ሰዎችን ለማፍራት ከልጅነት ጀምሮ መቅረጽ፣ ከልጅነት ጀምሮ ማስተማር ያስፈልጋል። ሀገሩን የሚወድ፣ ሥራውን የሚያፈቅር ትጉ፣ ለዜጋው የሚቆረቆር ንቁ የሆነ፣ ትውልድን መገንባት፣ አሳቢዎች፣ አሰላሳዮች፣ ምክንያታዊ የሆኑ ሰዎችን ማፍራትን ይጨምራል። ከሕጻንነት ጀምሮ ቀጣይነት ያለው ትምህርት መስጠት ከተቻለ ወደሚፈለገው ግብ መድረስ ይቻላል።

ትምህርት ሲባል ፊደል የመቁጠር፣ ክፍል የማለፍና ሠርተፊኬት የማግኘት ጉዳይ አይደለም። በእኔ ዕይታ የተማረ ማለት በሰለጠነበት ዘርፍ ክህሎት ያለው፣ የራሱን ጥበብ መጨመር የሚችል የበሰለ አስተሳሰብ ያለው፣ አገሩንና ሕዝቡን የሚወድ እንዲሁም በቅንነት በጎ ነገርን ለመሥራት ከሌሎች ጋር የሚተባበር ማለት ነው። በዚህ ረገድ ባለዲግሪ የሆኑ ሁሉ የተማሩ ላይሆኑ ይችላሉ።”

ከጥራትና ምርታማነት በተጨማሪ ደራሲው ስለሚመኙዋት ኢትዮጵያ ገፅታ፣ ስለሙሉ ሰው ባህሪያት መገለጫዎችና ሌሎችም ቁምነገሮች የተካተቱበትን ይህንኑ መፅሐፍ ቢያነቡ ያተርፋሉ።

ይምረጡ
(9 ሰዎች መርጠዋል)
356 ጊዜ ተነበዋል

Sendek Newspaper

Bole sub city behind Atlas hotel

Contact us