“በኦሮሚያና በአማራ ክልሎች የሚካሄዱ ተቃውሞዎች ‘ፈታኝ ተግዳሮቶች’ ናቸው”

Wednesday, 31 August 2016 12:42

“በኦሮሚያና በአማራ ክልሎች የሚካሄዱ ተቃውሞዎች

‘ፈታኝ ተግዳሮቶች’ ናቸው”

ዩናይትድ ስቴትስ አሜሪካ

በቶም ማልኖውስኪ (የአሜሪካ ከፍተኛ ባለሥልጣን)

 

በኦሮሚያና በአማራ ክልሎች እየተካሄዱ ላሉ  ተቃውሞዎች በምላሹ የኢትዮጵያ መንግስት የተከተለው ‹ራስን የመጻረር› ስልት ነው በማለት የኦባማ አስተዳደር የዲሞክራሲና ሰብአዊ መብት ከፍተኛ ባለስልጣን ቶም ማልኖውስኪ ይናገራሉ። ማልኖውስኪ የአሜሪካ የውጭ ጉዳይ ሚኒስትር ጆን ኬሪ ደህንነትን ጨምሮ በምስራቅ አፍሪካ ጉዳዮች  ላይ ለመወያየት ናይሮቢ ከመድረሳቸው ቀደም ብሎ በፃፉት በዚህ ጽሑፍ  የአዲስ አበባ ‹ቀጣይ ታላቅ ብሔራዊ ተግባር የፖለቲካ ግልጽነትን ለማስፈን የሚያጋጥሙ ተጋድሮቶችን በሚገባ መወጣት› እንደሆነ ገልፀዋል።

አሜሪካና ኢትዮጵያ አንዱ ለሌላው አስፈላጊ መሆኑን ታሳቢ ያደረገ ለዓመታት የዘለቀ ጠንካራ ግንኙነት አላቸው። ኢትዮጵያ ለአፍሪካ ሰላምና ደህንነት ከፍተኛ አስተዋጽኦ የምታደርግ፤ አፍራሽ ጽንፈኝነትን በመዋጋት ረገድ የአሜሪካ ዋና አጋር፤ ከየትኛውም አገር በላይ ብጥብጥና ጭቆናን ሸሽተው የተሰደዱ ስደተኞችን በማስተናገድ ለማመን የሚያስቸገር ልግስና ያሳየች አገር ነች። ኢትዮጵያ ድህነትን በማስወገድ፣ በአካባቢ ጥበቃና ኢኮኖሚዋን ለማሳደግ ለምታደርገው ጥረት አሜሪካ ከፍተኛ ድጋፍ በማድረግ ላይ ነች። 

ሁለቱ አገራት ባላቸው የጋራ ጥቅምና ወዳጅነት ምክንያት አሜሪካ በኢትዮጵያ ብልጽግና፣ መረጋጋትና ስኬታማነት የራስዋ ድርሻ አላት። ኢትዮጵያ በመልካም ጎዳና ላይ ስትሆን፤ ሌሎችን ማነሳሳትና መርዳት ትችላለች። በሌላ በኩል በኢትዮጵያ ለረጅም ጊዜ የሚቆይ ቀውስ ሲከሰት፤ ሁለቱ አገራት በጋራ ለማሳካት ያለሙትን ግብ ያኮስሳል።

በቅርቡ በኦሮሚያና በአማራ ክልሎች እየተካሄዱ ያሉ ተቃውሞዎች ፈታኝ ተግዳሮቶች ናቸው። እነዚህ ተቃውሞዎች ኢትዮጵያውያን በሕገ-መንግስቱ በሰፈረው መሰረት ለጥያቄዎቻቸው ምላሽ የሚሰጥና የፖለቲካ ብዝሀነትን የሚያሰፍን መንግስት እንዲኖር መፈለጋቸውን የሚያመለከቱ ናቸው።

በቅርቡ በኢትዮጵያ ባደረግኳቸው ሦስት ጉብኝቶች የመንግስት ባለስልጣናትን ጨምሮ ያገኘኋቸው ሁሉ፤ ኢትዮጵያውያን በበለፀጉና በተማሩ ቁጥር ይበልጥ የፖለቲካ ተሰሚነት እንዲኖራቸው እንደሚፈልጉ ገልጸውልኛል። ይህ ፍላጎታቸው ደግሞ ሊሟላላቸው ይገባል። ምንም እንኳን ጥቂቶቹ ተቃውሞዎች ለብጥብጥ መሳሪያነት ቢውሉም፤ አብዛኛዎቹ ተቃዋሚዎች የኢትዮጵያ ሕገ-መንግስት ሀሳባቸውን እንዲገልፁ የሰጣቸውን መብት እየተገበሩ እንደሆነ እናምናለን።

አሜሪካ የምትሰጠው ማንኛውም ምክር መፍትሔ ለማስገኘት ያለመ ሲሆን፤ በአክብሮት ጭምር ነው። ፕሬዚደንት ባራክ ኦባማ በሐምሌ 2007 ዓ.ም አዲስ አበባ በመጡበት ወቅት እንደተናገሩት፤ አሜሪካ ፍፁም እንከን አልባ አገር አይደለችም፤ የሕዝብን ብሶት ምላሽ በመስጠት ዙሪያ ከተሞክሯችን ጠቃሚ ትምህርት እየተማርን ነው።

ኢትዮጵያ ተጨባጭ የሆነ የውጪ ስጋት እንደተጋረጠባት እንገነዘባለን። ኢትዮጵያ በድንበሯ አካባቢ የመሸገውን የአልሻባብ አሸባሪ ቡድንን በጀግንነት ተጋፍጣለች። ከኢትዮጵያ ውጪ የሚኖሩና ራሳቸው ለሰብአዊ መብት ክብር በማይሰጡ አገራት የሚደገፉ ግለሰቦችና ቡድኖች አልፎ አልፎ በብጥብጥ ለውጥ ለማምጣት ሳይታክቱ ጥሪ ያቀርባሉ።

ኢትዮጵያ እንዲህ ያሉ ድርጊቶችን በአግባቡ ትኮንናለች፤ አሜሪካም እንዲሁ። ኢትዮጵያ በተለያዩ አካባቢዎች ተበታትነው የሚኖሩና በኢትዮጵያውያንም ብዙ ተቀባይነት የሌላቸው የጥፋት መልዕክተኞችን በመመከት ረገድ ብዙ ርቀት ተጉዛለች። ኢትዮጵያ በአሁኑ ወቅት ለደህንነቷና ለአንድነቷ እየገጠማት ያለው ችግር ምንጩ ከውስጥ ነው። በሺዎች የሚቆጠሩ ሰዎች፤ በበርካታ ቦታዎች፣ በብዙ ክልሎች ወደአውራ ጎዳናዎች በመውጣት ሕይወታቸውን በሚነኩ ጉዳዮች ተገቢ ድምጽ እንዲኖራቸው ሲጠይቁ የውጪ ጠላት ሴራ ነው ብሎ ማጣጣል የሚቻል አይሆንም።

የኢትዮጵያ ባለስልጣናት ሰልፈኞቹ አግባብነት ያለው ብሶት እንዳላቸውና ተገቢ ምላሽ እንደሚያስፈልጋቸው አምነው ተቀብለዋል። በዚህም እንደ ሙስናና በቂ የሥራ እድሎች ያለመመቻቸትን ለመዋጋት እየሰሩ ይገኛሉ። ሆኖም ግን የደህንነት ኃይሎች ከመጠን ያለፈ ኃይል በመጠቀም ኢትዮጵያውያን በሰላማዊ መንገድ እንዳይሰበሰቡ መከልከል፣ በርካቶችን መግደልና ማቁሰል እንዲሁም በሺዎች የሚቆጠሩ ዜጎችን ማሰራቸውን ቀጥለዋል። በሺዎች የሚቆጠሩ ኢትዮጵያውያን በተቃውሞ ሰልፎች ላይ ተገኝተዋል በሚል መሰረተ ቢስ ክስ በእስር እንደሚገኙ፤ አብዛኛዎቹም ለሕግ ያልቀረቡ፣ የሕግ አማካሪ የተከለከሉ ወይም በአግባቡ የወንጀል ክስ ያልተመሰረተባቸው እንደሆኑ እናምናለን።

ይህ ደግሞ ራስን የመጻረር ስልት ነው። የተቃዋሚ መሪዎችን ማሰርና የሲቪክ ማኅበረሰብ ተቋማትን መገደብ ሰዎችን ተቃውሞ ከማድረግ አያግዳቸውም። ይልቁንስ መንግስት በሰላም ለመደራደር የማይችልበትን መሪአልባ እንቅስቃሴ ይፈጥራል። የኢንተርኔት መስመርን መዝጋት ተቃውሞን አያረግብም፤ ነገር ግን የውጪ አገር ባለሀብቶችንና ጎብኚዎችን ስጋት ውስጥ ይከታል። ኃይልን መጠቀም ለጊዜው ተቃዋሚ ሰልፈኞችን ቢያረግብም፤ ይበልጥ ንዴታቸውን የሚያባብስና ወደጎዳና ተመልሶ ለመውጣት ምንም ነገር ከግምት ውስጥ እንዳያስገቡ ያደርጋቸዋል።

ማንኛውም መንግስት ዜጎቹን የመጠበቅ ግዴታ አለበት፤ ነገር ግን ሕጋዊነት ያለውና ስኬታማ መንግስት ዜጎቹን ያዳምጣል፣ ስህተቱን ያምናል፣ እንዲሁም ያለአግባብ ጉዳት ለደረሰባቸውም ካሣ ይከፍላል። ትችትን በግልጽነትና በሰላማዊ መንገድ ማስተናገድ በራስ መተማመንንና ጥበብን የሚያሳይ እንጂ ድክመት አይደለም።  በመንግስት፣ በሕዝብ ተወካዮች ምክር ቤት በማኅበረብ ውስጥ ነጻ ድምፆች ቢኖሩ፤ የሲቪክ ማኅበረሰብ ተቋማት የብዙሀኑን ችግር በሕጋዊ መስመር ቢያስተላልፉና የፖሊሲ መፍትሔዎችን ቢያቀርቡ፤ ኢትዮጵያ የበለጠ ትጠነክራለች። መንግስትን የሚተቹ ሁሉ መፍትሔ በማፈላለጉ ሂደት ኃላፊነትንና ተጠያቂነትን እንዲጋሩ ያደርጋል። ስርዓቱን ለማደስ የሚደረግ ሂደትም የሕዝብ ጥያቄዎችን ሙሉ በሙሉ ከመቃወም ወደመግባባት ያደርሳል።

የኢትዮጵያ ቀጣዩ ብሔራዊ ኃላፊነት የሚሆነውም የኢኮኖሚ እድገት እንቅፋቶችን እንዳስወገደ ሁሉ የፖለቲካ ግልጽነት ተግዳሮቶችን መዋጋት ነው። ኢትዮጵያ ረሀብና ሽብር ከሰፈነባቸው ጊዜያት የተጓዘችባቸውን ርቀት ከግምት በማስገባት፤ ኢትዮጵያውያን እነዚህን ተግዳሮቶች እንደሚያስወግዱ አሜሪካ ሙሉ ተስፋ አላት። ይህንንም የሚያደርጉት ሌላን አገር ለማስደሰት ሳይሆን የራሳቸውን ራዕይ ለማሳካት ነው። አሜሪካም ሆነች ሌሎች የኢትዮጵያ ወዳጆች እጃቸውን ለመረዘርጋት ዝግጁዎች ናቸው።

$1·         ቶም ማልኖውስኪ የአሜሪካ የዲሞክራሲ፣ ሰብአዊ መብትና ሠራተኞች ምክትል ሚኒስትር ናቸው።     

Last modified on Wednesday, 31 August 2016 12:57
ይምረጡ
(0 ሰዎች መርጠዋል)
280 ጊዜ ተነበዋል

Sendek Newspaper

Bole sub city behind Atlas hotel

Contact us