ሚድሮክ ወርቅ ማዕድን ኩባንያ ከቢቢሲ የአማርኛ ክፍል ለቀረበ «የተሳሳተ» ዘገባ የሰጠው ምላሽ

Wednesday, 13 December 2017 12:32

ቢቢሲ የአማርኛ አገልግሎት ሰኞ ታህሳስ 2 ቀን 2010 (ዲሴምበር 11 /2017) «አዶ ሻኪሶ ወርቅ መርዝ የሆነባት ምድር» በሚል ርዕስ የሰራችሁትን ዘገባ ከድረገጻችሁ አግኝተን ተመልክተናል። ዘገባው በማወቅም ይሁን ባለማወቅ መሠረታዊ የሆነውን የጋዜጠኝነት መርህ ማለትም ሚዛናዊነት የሳተና ባለቤቱን በማግለል የአንድ ወገን አስተያየት ብቻ የተስተናገደበት መሆኑ በእጅጉ አሳዝኖናል። 

 

በዚህ ዘገባ ውስጥ ሚድሮክ ወርቅ ማዕድን ኩባንያ ተፈጥረዋል ተብለው በዘገባው ውስጥ ለተጠቀሱ ችግሮች ብቸኛ ተጠያቂ ተደርጎ ሲቀርብ ኩባንያው ግን እየተጠየቀበት ስላለው ጉዳይ መልስ እንዲሰጥ ዕድል ከመስጠት ይልቅ ሌሎች ወገኖች ባሉት ላይ ብቻ ተመስርቶ በይሆናል ወይንም በግምት የተዛባ ዘገባ ለማሰራጨት የተፈለገበት ምክንያት እስካሁንም ለእኛ እንቆቅልሽ ነው። እናም ሳንጠየቅና እየቀረበብን ላለው ክስ ምላሽ እንድንሰጥ ዕድሉ ሳይሰጠን የቀረበው ዘገባ ከጋዜጠኝነት ሙያ ሥነምግባር እና ከሞራልም አኳያ ቢቢሲን ያህል ትልቅ ተቋም የማይመጥን ስህተት በመሆኑ ሊታረም ይገባል እንላለን።

 

በዘገባው ውስጥ የሰፈሩ ተገቢ ያልሆኑ የስም ማጥፋት አስተያየቶች እንደሚከተለው ምላሻችንን እናቀርባለን፣

 

የሚድሮክ ለገደንቢ ወርቅ ማምረቻ ወርቅና ነሐስ በሚያመርትበት ግዜ ወርቁን ለማጽዳት የሚጠቀምበት «ሳናይድ» የተባለ ኬሚካል በሰዎችና በአካባቢ ላይ ጉዳት እያደረሰ መሆኑ በዘገባው ተመልክቷል። በተጨባጭ ያለው እውነታ ግን ምንድነው የሚለውን ማየት ተገቢ ይሆናል። ህዳር 28 ቀን 2010 ዓ.ም (ዲሴምበር 7 ቀን 2017) በማዕድን ነዳጅ እና የተፈጥሮ ጋዝ ሚኒስቴር የመሰብሰቢያ አዳራሽ በየደረጃው የሚገኙ ጉዳዩ በቀጥታና በተዘዋዋሪ የሚመለከታቸው የክልልና ፌዴራል መንግሥታዊ አካላት፣ ሚድሮክ ወርቅ ማዕድን ኩባንያን ጨምሮ የዘርፉ ባለሃብቶች በተገኙበት የተካሄደ ስብሰባ ነበር። በዚህ ስብሰባ ላይ የአካባቢ ጥበቃ ጉዳይ ተነሰቷል። ምናልባትም ለዘገባችሁ የመጀመሪያ መነሻ ሃሳብ ይህ ስብሰባ ሊሆን እንደሚችል እንገምታለን። በዚህ ስብሰባ ላይ የኬሚካል ጉዳት ጉዳይ በተነሳበት ወቅት በመድረኩ የተገኙት የሚድሮክ ቴክኖሎጂ ግሩፕ ቺፍ ኤግዚኪዩቲቭ ኦፊሰርና የሚድሮክ ወርቅ ኩባንያ ዋናሥራ አስኪያጅ ዶ/ር አረጋ ይርዳው ስለተጨባጭ ሁኔታው ማብራሪያ ሰጥተዋል። ሚድሮክ ወርቅ ኩባንያ ዓለም አቀፍ ደረጃን በሟላ ሁኔታ የአካባቢ ጥበቃ ተጽዕኖ ግምገማ (Environmental impact assessment) አስጠንቶ ወደሥራ የገባ ኩባንያና በሚኒስቴሩም ሆነ በሌሎች ሀገር በቀል ኩባንያዎች በአርአያነት የሚጠቀስ መሆኑን ያስረዱ ሲሆን የተባለው የኬሚካል ችግር ፍጹም እንደሌለ፣ ያስረዱ ሲሆን ሆኖም ጥርጣሬዎችን ይበልጥ ለማጥራትና ሙሉ በሙሉ መተማመንን ለመፍጠር እንዲያግዝ የተጠቀሰውን ችግር ገለልተኛ የባለሙያዎች ቡድን ተዋቅሮ ጥናት ቢያካሂድ ለጥናቱ አስፈላጊውን ወጪ ኩባንያው እንደሚሸፍን ቃል ገብተዋል። በዚሁ መሠረት ሚኒስቴሩ ጉዳዩን ትኩረት በመስጠት ከኬሚካል ጋር ተያይዞ ተፈጠረ የተባለው ችግር እንዲጠና ተገቢውን መመሪያ በመድረኩ ላይ ሰጥቷል።

 

ሚድሮክ ወርቅ ማዕድን ኩባንያ የለገደንቢ ወርቅ ማምረቻ በፕራቬታይዜሽን ሒደት ተላልፎለት ከመረከቡ በፊት «ሜሪኩሪ» የተባለ ኬሚካል ለማጣሪያ ጥቅም ላይ ይውል የነበረበት ሁኔታ እንደነበር የሚታወስ ነው። ሜሪኩሪ በሰዎችና በአካባቢ ላይ የሚያስከትለውን ጉዳት ኩባንያችን አስቀድሞ በመገንዘብ ወደሥራ በሚገባበት ጊዜ በአሁኑ ሰዓት በዓለም አቀፍ ደረጃ ለወርቅ ማጣሪያ የሚጠቀምበትን «ሳናይድ» የተባለ ኬሚካል መጠቀም ጀምሯል። ኩባንያችን ይህን ዓለም የተቀበለውን አሠራር የመረጠው በሕዝብና በአካባቢ ላይ ጉዳት እንዳይከተል በማሰብ ጭምር ነው። ኩባንያችን በተጨማሪም የአካባቢን ጉዳይ የሚከታተል ራሱን የቻለ ዲፓርትመንት በማቋቋም በየጊዜው ከአካባቢው ሕብረተሰብ ጋር በቅርበት በመገናኘትና በመወያየት እንዲሁም ለአካባቢ ጥበቃ አስተዋጽኦ የሚያደርጉ ዛፎች እንዲተከሉና እንክብካቤ እንዲደረግላቸው በማድረግ ለአካባቢ ጥበቃ የበኩሉን አስተዋጽኦ እያደረገ ያለ ኩባንያ መሆኑም የሚታወቅ ነው።

 

ኩባንያችን ላይ የቀረበው ክስ በምርመራ ያልተረጋገጠ ስለመሆኑ፣

 

በኦሮሚያ ክልል ጉጂ ዞን አዶ ሻኪሶ አካባቢ በማዕድን ማውጣት ሥራ ላይ የተሠማራው ሚድሮክ ወርቅ ኩባንያ ብቻ አለመሆኑ ይታወቃል። ሌሎች የመንግሥትና የግል ባለሃብቶችም ከ60 ዓመታት በላይ በተመሳሳይ ሥራ ላይ መሆናቸው የሚታወቅ እውነት ነው። ከኬሚካል ጋር ተያይዞ ደረሰ የተባለው ጉዳት በእርግጥም የሚድሮክ ችግር ብቻ ስለመሆኑ የተጨበጠ ማስረጃ በሌለበት ሁኔታ በዘገባችሁ እርግጠኛ በመሆን ኩባንያችን ላይ ብቻ ያነጣጠረ አፍራሽና ጎጂ ዘገባ መቅረቡ ከሙያ ሥነምግባር ውጪ ነው። ችግሩ ተከስቷል እንኳን ቢባል በየትኛው ኩባንያ እንደተከሰተ ተጨማሪ ጥናትና ምርምር ማድረግን ይጠይቃል። ባለቤቱን ቀርቦ ማነጋገርና ተገቢውን መረጃ መሰብሰብ ይጠይቃል። እንዲሁ በስሜት የሚደረግ ዘገባ በርካታ ሠራተኞች በማቀፍ ለአገር ኢኮኖሚ አዎንታዊ ሚና የሚጫወተውን እንደእኛ ያለ ኩባንያ የሚጎዳ ብቻ ሳይሆን በሕግም ጭምር የሚያስጠይቅ የስም ማጥፋት ወንጀል ነው።

 

የደረሰ ጉዳት የሌለ ስለመሆኑ፣


ኩባንያችን አካባቢ በጠበቀና ሳይንሳዊ በሆነ መልኩ የሚሠራ በመሆኑ በአካባቢ ላይም ሆነ በሰዎች ላይ ከኬሚካል ጋር ተያይዞ የተፈጠረ ችግር የለም። ይህን የምንለው በህብረተሰቡ ውስጥ ሆነን ማህበራዊ ችግሮቹን ጭምር እየተካፈልን የምንሰራ በመሆናችን እንደዚህ ያለ ትልቅ ችግር ቀርቶ አነስተኛ ችግሮችም ቢኖሩ የምናውቅበትና፤ ችግር ተከስቶም ከሆነ በወቅቱ የምናርምበት ዕድል ሰፊ በመሆኑ ነው።


ከላይ በተጠቀሰው ስብሰባ በማዕድን ነዳጅና ተፈጥሮ ጋዝ ሚኒስቴር የአካባቢና የማህበረሰብ ልማት ዳይሬክቶሬት ዳይሬክተር በበኩላቸው ከዚህ ቀደም ባደረግነው ክትትልና ቁጥጥር ሒደት በኬሚካል የደረሰ ጉዳት አላየንም፣ ከማህበረሰብም ሆነ ከመንግሥት አካል የደረሰን ቅሬታ የለም በሚል መግለጫም ሰጥተዋል።

 

የህብረተሰቡን ማህበራዊ ችግሮች መካፈልን በተመለከተ፣


ሚድሮክ ወርቅ ማዕድን የአካባቢው ማህበረሰብ ከልማቱ በቀጥታና በተዘዋዋሪ ተጠቃሚ እንዲሆን የበኩሉን አስተዋጽኦ ሲያደርግ ቆይቷል። በዚህ መሠረት ኩባንያው ባለፉት ዓመታት በአብዛኛው በራሱ ተነሳሽነት የአካባቢውን ማህበረሰብ የሚጠቅሙ እንደትምህርት ቤቶች፣ የጤና ኬላዎች፣ የመንገድ ግንባታና የመሳሰሉትን የልማት ተግባራት አከናውኗል። የአካባቢው ወጣቶችም ለሥራ ዕድል ቅድሚያ ከመስጠት ጀምሮ ትምህርታቸውን እንዲከታተሉ የነጻ ትምህርት ዕድል እስከመስጠት የዘለቀ አስተዋጽኦ በማድረግ ላይ ይገኛል። ይህ እውነታ የሚታይና ሌላ ማንም ሳይሆን እዚያው በልማቱ ተጠቃሚ የሆነው ሰፊው ሕዝብ የሚመሰክረው ነው። በተጨማሪም ይህ እውነታ በክልሉም ሆነ በሚኒስቴር መ/ቤቱ የሚታወቅ መሆኑን፣ ተጨማሪ ዝርዝር ግልጽ መረጃ ያለው መጽሔትም በየጊዜው ስናወጣ መቆየታችን ማስታወስ እንወዳለን።


በተጨማሪም የኩባንያው የጥበቃ ሠራተኞች በአካባቢው ነዋሪ ላይ ልዩ ልዩ ችግሮችን ያደርሳሉ በሚል በዘገባው የተካተተ ቅሬታ አለ። በመሠረቱ ኩባንያው ውስጥ በርካታ ሠራተኞች ከአካባቢው ተቀጥረው ተጠቃሚ ሆነዋል። ኩባንያችን በዓመት ከ100 ሚሊየን ብር በላይ ለደመወዝ ብቻ ወጪ በማድረግ የአካባቢው ህብረተሰብ የኢኮኖሚ ተጠቃሚነት በተግባር ማሳየት የቻለ ኩባንያ ነው። በዚህ ሒደት አልፎ አልፎ የሥራ ዕድል ያልደረሳቸው ግለሰቦች ቅሬታ ሊያቀርቡ ቢችሉም ይህ ቅሬታ ሰፊውን ህብረተሰብ የሚወክል ተደርጎ መቅረቡ የተሳሳተ ጥቅል ድምዳሜ ሆኖ አግኝተነዋል። የኩባንያው የጸጥታ አስከባሪ ሠራተኞችም በተመሳሳይ ሁኔታ ከአካባቢው ህብረተሰብ የወጡና ህብረተሰቡ የሚያውቃቸው ግለሰቦች ናቸው። እነዚህ ሠራተኞቻችን በተለየ ሁኔታ የአካባቢው ህብረተሰብ ላይ ችግር ለመፍጠር ይንቀሳቀሳሉ የሚለው አስተያየት በምንም መመዘኛ አሳማኝ አይደለም። ምናልባት በተለየ ሁኔታ ችግር ደርሶብኛል የሚል ግለሰብ ካለ ቅሬታውን አቅርቦ ልናየው የምንችለው ከመሆኑ በስተቀር ሕብረተሰቡ በጅምላ ቅሬታ የሚያቀርብበት ሁኔታ አለመኖሩን ማረጋገጥ እንወዳለን።

 

የገቢ ግብር ግዴታን ከመወጣት አንጻር፣


ሚድሮክ ወርቅ ማዕድን በሮያሊቲ፣ በተለያዩ የግብር ክፍያዎች ከአጠቃላይ ገቢው እስከ 50 በመቶ ወጪ በማድረግ በየዓመቱ ለፌዴራልና ለክልል መንግሥታት ገቢ ያደርጋል። በዚህም ለአገር ኢኮኖሚ ዕድገት የበኩሉን ድርሻ እየተወጣ ያለና ሕግና ሥርዓትን አክብሮ የሚሠራ ኩባንያ መሆኑም ይታወቃል። በሥራ ፈጣሪነትም በፕራቬታይዜሽን የተረከበውን 600 ሠራተኞች ቁጥር ወደ 1200 በማድረስና በዓመት 140 ሚሊየን ብር ለሠራተኞች ደመወዝና ጥቅማጥቅሞች የሚከፍል ተሸላሚ ኩባንያ ነው።

 

በመጨረሻም፡- ቢቢሲን ጨምሮ ማናቸውም መገናኛ ብዙሃን ኩባንያችንን በሚመለከት ለሚያቀርቡልን የመረጃ ጥያቄ በራችን መቼም ቢሆን ክፍት መሆኑን በዚህ አጋጣሚ እያረጋገጥን በዘገባችሁ የተሰራው ስህተት ከኩባንያው አልፎ አገርንም የልማት ሒደት የሚደናቅፍ ሥራ ስለሆነ እንዲታረም እንጠይቃለን።


- ሚድሮክ ወርቅ ማዕድን ኩባንያ እና ሚድሮክ ቴክኖሎጂ ግሩፕ ሕዝብ ግንኙነት ክፍሎች 

ይምረጡ
(0 ሰዎች መርጠዋል)
195 ጊዜ ተነበዋል

ተጨማሪ ጽህፎች ከ news admin

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 1057 guests and no members online

Sendek Newspaper

Bole sub city behind Atlas hotel

Contact us