ዳሸን ባንክ ለውጪ ምንዛሬ ግኝት አስተዋጽኦ ላደረጉ ደንበኞቹ ዕውቅና ሰጠ

Wednesday, 25 April 2018 12:41

 

ዳሸን ባንክ ከፍተኛ የውጭ ምንዛሬ ላስገኙለት ደንበኞቹ ሚያዚያ 11 ቀን 2010 ዓ.ም በሸራተን አዲስ ሆቴል ባዘጋጀው መርሃ - ግብር ዕውቅና ሰጠ።

በሥነሥርዓቱ ላይ 168 የንግድ ተቋማት፣ መንግስታዊ ያልሆኑ ድርጅቶች እንዲሁም ግለሰቦች ለባንኩ ባስገኙት የላቀ የውጭ ምንዛሬ ግኝት ዕውቅና ተችሯቸዋል።

ለባንኩ የውጭ ምንዛሬ ግኝት ላኪዎች፣ ገንዘብ አስተላላፊዎች፣ ዓለም አቀፍ የሃዋላ ተቀባዮች፣ በውጭ ምንዛሬ ተቀማጭ ሂሳብ አንቀሳቃሾች፣ ክፍያን በዓለም አቀፍ ካርዶች የሚቀበሉ አጋር የንግድ ተቋማት ዕውቅና ከተሰጣቸው መካከል ይገኙበታል።

ዝግጅቱ ባንኩ ከሚመለከታቸው ባለድርሻ አካላት ጋር እጅ ለእጅ ተያይዞ የሀገሪቱን የውጭ ምንዛሬ ግኝት ለማሳደግ ቁርጠኛ መሆኑን ያሳሰቡበት ሆኗል።

የውጭ ምንዛሬ ምንጭ ለሆኑ የባንኩ ደንበኞች ደረጃውን የጠበቀ አገልግሎት ለመስጠት ብሎም ከውጭ ምንዛሬ ጋር በተያያዘ ከሚመለከታቸው ባለድርሻ አካላት ጋር ቁርኝቱን ለማጎልበት ባንኩ ከምንጊዜውም በላይ ቁርጠኛ መሆኑን የዳሸን ባንክ የቦርድ ሊቀመንበር አቶ ነዋይ በየነ እንዲሁም የባንኩ ፕሬዝዳንት አቶ አስፋው ዓለሙ በወቅቱ አስታውቀዋል።

በዕውቅና መስጫ ስነ -ስርዓቱ ወቅት የውጪ ምንዛሬ የሚያስገኙ የዳሸን ባንክ ደንበኞችን ተጠቃሚ ስለሚያደርጉ የብድር አቅርቦቶች በባንኩ ከፍተኛ ኃላፊዎች ገለፃ ተደርጓል።

ከፍተኛ የመንግስት ባለስልጣናት፣ የባንክ ኃላፊዎች፣ ኤክስፖርተሮች፣ በሆቴልና ሱፐርማርኬት ዘርፎች የተሰማሩ ባለሃብቶች እንዲሁም የንግድ ዘርፍ አመራሮች በመርሃ - ግብሩ ታድመዋል።

እ.ኤ.አ. በ2016/17 የበጀት ዓለም ዳሸን ባንክ ከ530 ሚሊየን የአሜሪካን ዶላር በላይ የውጭ ምንዛሬ ሊያገኝ ችሏል። ባንኩ በ70 ሀገራት ውስጥ በሚገኙ ከ170 በላይ ከተሞች ከሚገኙ 461 ባንኮች ጋር ትስስር ፈጥሮ በመስራት ላይ ይገኛል።

ይምረጡ
(0 ሰዎች መርጠዋል)
106 ጊዜ ተነበዋል

Sendek Newspaper

Bole sub city behind Atlas hotel

Contact us