You are here:መነሻ ገፅ»መልዕክቶች
መልዕክቶች

መልዕክቶች (309)

 

በአዲስ አበባ ከተማ የሚገኙ ሥራ አጦችን ወደ ሥራ ለማሰማራት የተያዘው እቅድ 10 በመቶ ብቻ መሳካቱን የከተማዋ ጥቃቅንና አነስተኛ ኢንተርፕራይዞች ልማት ቢሮ ሰሞኑን ገልጿል። ነገሩ በርካታ ጥያቄዎችን የሚያስነሳ ነው።

 

ከሁሉም በላይ ደግሞ ለአፈፃፀሙ ዝቅተኛነት የተሰጠው ምክንያት አስገራሚ ነው። ቢሮው እንዳሳወቀው ከሆነ በርካታ ሼዶች በሕገወጥ መንገድ የተያዙ ሲሆን፤ ጥቂት የማይባሉት ደግሞ በማንም ሳይያዙ ተቆልፈው የተቀመጡ ናቸው። በመጀመሪያ ደረጃ ያለውን ሀብት በአግባቡ አከፋፍሎ ሁሉም እድሉን እንዲያገኝ ማድረግ መቅደም ነበረበት። ነገር ግን ያለውን የሥራ እድል ፍትሐዊ በሆነ መንገድ ሳያከፋፍሉ ይሄን ያህል ሥራ አጥ አለ ብሎ መደምደም በራሱ አስቸጋሪ ብቻም ሳይሆን አሳፋሪ ነው። አንድ ግለሰብ ብቻ ባለአራት ፎቅ ሼድ ብቻውን ሲገለገልበት እንደቆየ ጭምር ነው ቢሮው የገለፀው። ታዲያ ለበርካቶች የሥራ እድል መፍጠር የሚችሉት እነዚህ ሼዶች የግለሰብ መጠቀሚያ ሲሆኑ ምን እየተሰራ ነበር? ይሰራባቸዋል ተብለው ገንዘብ ፈሶባቸው የተገነቡ ነገር ግን ተቆልፈው የተቀመጡ ሼዶችስ የሚመለከታቸው አካል አያውቃቸው ይሆን ወይስ ምክንያቱ ምን ይሆን? እነዚህን የተዝረከረኩ አሰራሮች ማፅዳት ሳይቻል እንዴት እቅዱን ለማሳካት ይታሰባል? እንዲያው አቅደን ነበር ለማለት ያክል ካልሆነ በስተቀር መቅደም ያለበትን ነገር ሳያስቀድሙ እዚህኛው ላይ መንጠልጠሉ የግብር ይውጣ እቅድ ይመስላል። አሁንም ቢሆን ችግሩን ማስተካከል እና ሥራ አጦችን መታደግ የቢሮው ትልቅ የቤት ሥራ ነው።

አስቻለው ታደስ - ከቄራ


መንግስት በአረብ ሀገሮች በዜጎች ላይ እየደረሱ ያሉትን ጉዳቶች ለማስቀረት ጥሎት የነበረውን የአረብ ሀገራት ጉዞ እገዳ ሰሞኑን ማንሳቱን ገልጿል። ይሄን ለረጅም ጊዜ ሲጠበቅ የነበረ የጉዞ እገዳ መነሳት ተከትሎም በርካታ ዜጎች ወደነዚህ የአረብ ሀገራት የመሰደድ እንቅስቃሴን እየጀመሩ ይገኛሉ። መንግስት ጉዞውን ህጋዊ መንገድ የዜጎችን ደህንነት የጠበቀ ለማድረግ በርካታ ተግባራትን ማከናወኑን እና አካሄዱንም ህጋዊ የማድረግ ስራውን እየሰራ መሆኑን ቢገልፅም በሌላ በኩል ደግሞ በርካታ ዜጎች የህገ-ወጥ ደላሎች መጠቀሚያ እየሆኑ ነው። ሕገ-ወጥ ደላሎች ይሄንን አጋጣሚ በመጠቀም ጉዞው በመፈቀዱ በቀላሉ ወደ ውጭ እንልክላችኋለን እያሉ በርካቶችን ወደ ተሳሳተ መንገድ በመምራት ላይ ይገኛሉ። እነዚህ ህገወጥ ደላሎች ከምን ጊዜውም በላይ በአሁኑ ወቅት በስፋት እየተንቀሳቀሱ ለመሆናቸው በየቦታው ለጉዞ የሚደረገው ሩጫ ምስክር ነው። የጉዞ እገዳው መነሳትን አጥብቀው ሲጠባበቁ የነበሩ በርካታ ዜጎች ዜናውን በመስማታቸው ብቻ ለጉዞ በመዘጋጀት ላይ ይገኛሉ። ይሄ ደግሞ ረጅም ጊዜን ወስዶ የተለፋበትን የህጋዊ ጉዞ ከንቱ የሚያስቀረው ነው የሚሆነው። መንግስት ከመቼውም ጊዜ በላይ በህገ-ወጥ ደላሎች ላይ የሚያደርገውን ቁጥጥር ማጠናከር ያለበት አሁን ይመስለኛል። ዜጎችም የህገ - ወጥ ደላች መጠቀሚያ ከመሆን ይድኑ ዘንድ በቂ መረጃ ሊሰጣቸው እና ግንዛቤው ሊኖራቸው ይገባል።

አቶሲሳይመስፍን - ከሀያት

 

ጋዜጣችሁ ባለፈው ሳምንት እትማችሁ ታክሲ ለማሽከርከር የግድ 10 ክፍልን ማጠናቀቅን የሚጠይቅ አዋጅ በህዝብ ተወካዮች ምክር ቤት መጽደቁን በዜና ገጿ አስነብባናለች። ከዜናው መረዳት እንደቻልነው በርካታ ግልፅ ያልሆኑ ነገሮች አሉ። አንድ ሰው ይሄንን የመንጃ ፈቃድ ለማግኘት እና ታክሲ ለማሽከርከር የግድ በዚህ የትምህርት ደረጃ ላይ መድረስ ካለበት ከዚህ ቀደም የመንጃ ፈቃድ አውጥተው ታክሲ እያሽከረከሩ ያሉ ነገር ግን 10 ክፍልን ያላጠናቀቁ ሰዎች እጣ ፈንታ ምን ይሆን? በትምህርት ደረጃ 5 ክፍል ያልዘለሉ እና ማንበብና መፃፍ ብቻ የሚችሉ ሰዎች ጭምር ታክሲ እያሽከረከሩ ባሉበት በአሁኑ ወቅት እንዲህ አይነቱን አዋጅ ተግባራዊ ማድረጉ ትንሽ አስቸጋሪ ይመስላል። ነገር ግን ለመተግበር ተዘጋጅተናል ብሎ የተነሳው አካል ስለ አዋጁ ግልፅ የሆነ መረጃን ለህዝብ ቢሰጥ መልካም ነው። ዝግጅት ክፍላችሁም አዋጁን በተመለከተ ሰፋ ያለ ማብራሪያ ቢቻል በባለሞያ ታግዞ ቢያቀርብልን መልካም ነው። በተረፈ ግን አዋጁ በብዙዎች ላይ ግርታን ከመፍጠሩም በተጨማሪ ስጋት ላይ የጣላቸው አካላት አሉ።

በስልክ - ከመገናኛ የተሰጠ አስተያየት  

 

 

በሀገራችን በየዓመቱ በሚሊዮኖች ብር የሚቆጠር ዋጋ ያላቸው መድሐኒቶች በተለያዩ ምክንያቶች እንደሚቃጠሉ የመድሐኒት ፈንድና አቅርቦት ኤጀንሲ ሰሞኑን ገልጿል። መድሐኒቶቹ እንዲቃጠሉ ከሚደረጉባቸው ምክንያቶች መካከል አንዱ የመድሐኒቶቹ የመጠቀሚያ ጊዜ ማለፍ ነው። ኤጀንሲው ባለው መረጃ መሠረት ይሄን ያህል መድሐኒት መቃጠሉን ይግለፅ እንጂ ከዚህ የማይተናነስ መድሐኒት ደግሞ አገልግሎት ላይ ውሎ ሊሆን ይችላል፤ በአሁኑ ሰዓትም ሰዎች እየተጠቀሙበት ሊሆን ይችላል። የመድሐኒት እና የሀኪሞች ጉዳይ እጅግ ትልቅ ትኩረት ሊደረግበት የሚገባ ጉዳይ በመሆኑ ኤጀንሲው ከፍተኛ ትኩረት ሰጥቶ ሊቆጣጠረው ይገባል። በአሁኑ ሰዓት በየጉራንጉሩ መድሐኒት ቤቶች እና ክሊኒኮች በቀላሉ ሲከፈቱ እያየን ነው። እነዚህ መድሐኒት ቤቶችና ክሊኒኮች ፈቃድ ወስደው ወደ ሥራ ከገቡ በኋላ ምን ዓይነት አገልግሎት እየሰጡ እንደሆነ፣ የሚጠቀሙባቸው መሣሪያዎች እና መድሐኒቶች ሁኔታ እንዲሁም አገልግሎት የሚሰጡት ባለሙያዎች ችሎታ በየጊዜው መፈተሽ ይኖርበታል። በአጠቃላይ የጤና ዘርፍ አገልግሎትን በተመለከተ በርካታ ተቃውሞዎች እና ምሬቶች ሲነሱ መስማት አዲስ አይደለም። የመንግስት ሆስፒታሎችን ጨምሮ አብዛኞቹ የጤና ተቋማት ሁልጊዜ ወቀሳ እንደተሰነዘረባቸው ነው። ኤጀንሲው ያወጣው መረጃም የሚያመለክተው እየተደረገ ያለው ቁጥጥር ክፍተት እንዳለበት ነው። ይሄ መረጃ ለኤጀንሲውም ተጨማሪ የቤት ሥራ የሚሰጥ ነው። የመድሐኒትና ሕክምና አገልግሎትና የሕክምና መገልገያዎች ቁሳቁስ ጉዳይ የህይወት ጉዳይ በመሆኑ ቁጥጥሩን ማጠናከር አስፈላጊ ነው።

ማርታአያሌው  - ከአቧሬ¾

በሀሰተኛ የትምህርት ማስረጃ በተለያዩ ቦታዎች ላይ ተቀጥረው የሚሰሩ ሰዎች ራሳቸውን እንዲያጋልጡ እድል ተሰጥቷቸዋል። በተሰጠው የጊዜ ገደብ ውስጥ በየክልሉ በርካታ ሰዎች ራሳቸውን ያጋለጡ ሲሆን ራስን የማጋለጫ ጊዜውን እስከማራዘም የደረሰ ትብብርም እየተደረገላቸው ነው። ነገርየው ለውጥ ማምጣት ከቻለ መልካም ነው። ሰዎች በራሳቸው ተነሳሽነት ራሳቸውን እንዲያጋልጡ እድል መሰጠቱ የአንድ ሰሞን አጀንዳ ከመሆን የዘለለ ፋይዳ እንዲኖረው ማድረግ ግን ያስፈልጋል። ዋናው ጥያቄ የሚሆነው እነዚህ ሰዎች ራሳቸውን ካጋለጡ በኋላ የሚከተለው ነገር ምንድን ነው? የሚለው ነው። እነዚህ ሰዎች ይብዛም ይነስም ደሞዝ እየተከፈላቸው የራሳቸውን ቤተሰብ የሚያስተዳድሩ ናቸው። በአንድ ሰው ጥላ ስርም ሌሎች በርካታ ሰዎች ይኖራሉ። ስለዚህ በዚህ ሰው ላይ የሚወስደው ማንኛውም እርምጃ ግለሰቡን ብቻ ሳይሆን እነዚህን ሰዎችም ከግምት ውስጥ ያስገባ መሆን ይኖርበታል። ይሄ ሲታሰብ ደግሞ ማጋለጥ፣ ያለማጋለጡ ጉዳይ ሳይሆን በቀጣይ ምን ሊከሰት እንደሚችል ማሰቡ ይከብዳል። በሌላ በኩል ደግሞ ድርጊቱ ወንጀል እንደመሆኑ እርምጃ ሊወሰድ ይገባል። ስለዚህ ለማጋለጥ ከመሯሯጡ በፊት በቀጣይ የእነዚህ ሰዎች ማረፊያ ምን እንደሆነ ሊጠና እና ሊታሰብበት ይገባል።

 

ሌላው ከዚህ ጉዳይ ጋር ተያይዞ ሊነሳ የሚገባው ጉዳይ የችግሩ መንስኤ ምንድን ነው? የሚለው ነው። ችግሩ አሁን የጀመረ ሳይሆን ቀደም ብሎ የተጀመረ ነገር ግን አሁንም ድረስ የቀጠለ ችግር ነው። ለዚህ ወንጀል ተባባሪ የሆነ በየመንደሩ ውስጥ ሀሰተኛ ማስረጃዎችን የሚያዘጋጁ በርካታ ተቋማት እንዳሉ ይታወቃል። ነገር ግን እነዚህን ተቋማት ለመቆጣጠር እና ከድርጊታቸው ለማስቆም እየተሄደበት ያለው መንገድ ምን ያህል ርቀት ተጉዟል የሚለውንም እግረ-መንገድ መፈተሽ ያስፈልጋል። ከዚህ ውጪ ግን ለእውቀት ሳይሆን ለወረቀት ሲባል ብቻ በገንዘብ የሚደረገውን የትምህርት ማስረጃ ሸመታ በቀላሉ ማስቆም ከባድ ነው የሚሆነው። ችግሩን መቅረፍ የሚቻለው ምንጩን በማድረቅ ብቻ ነው።

                           ዘላለም ንጉሴ - ከሾላ   

 

ባለፈው ሳምንት በወጣው ጋዜጣችሁ ላይ የሳዕሊተ ምህረት ቅድስት ማሪያም ቤተክርስቲያን ላይ የተከሰተውን አሳፋሪ ድርጊት አስነብባችሁናል። ከዜናው መረዳት የሚቻለው ምእመናኑ ትእግስታቸው መጠን ማለፉን እና የሚፈፀመው ድርጊት በጣም አሳፋሪ መሆኑን ነው። የዚህ ደብር ምዕመናን ታግለው አደባባይ በመውጣታቸው ያለው ችግር ታወቀ እንጂ በየቦታው ያሉ ደብሮችም ቢፈተሹ በርካታ ለማመን የሚከብዱ ምስጢራትን በውስጣቸው ይዘው ይሆናል። እንዲህ ጎልቶ አይታይ እንጂ በየትኛውም ደብር ቢኬድ ምእመናንን የሚያስከፉ በርካታ ድርጎቶች እየተስተዋሉ ናቸው። ለሌላው ህዝብ አርአያ መሆን እና ህዝቡን ማስተማር የሚገባቸው ካህናት እና የሃይማኖት አባቶች ሳይቀሩ የቤተ ክርስቲያናትን ገንዘብ እየበዘበዙ እንደሚገኙ በተደጋጋሚ ይነሳል። ለዚህ ደግሞ ምቹ ሁኔታን የፈጠረላቸው በአብዛኛው ከምዕመናን ለቤተክርስቲያን የሚሰጠው ገንዘብ በአንድ ወጥ በሆነ ስርዓት ከመሆን ይልቅ በባህላዊ እና በእምነት ብቻ መሆን ነው። ቤተክርስቲያናቱ ወጥ እና ግልፅ የሆነ የገንዘብ ገቢ ማድረጊያ እና ወጪ ማድረጊያ ስርዓት ተጠቃሚ ብትሆን በተወሰነ ደረጃ እንዲህ አይነቱን መስመር የሳተ እና ህገወጥ ድርጊት መከላከል የሚቻል ይመስለኛል። አሁን ያለው ነገር ግን ማን ምን እንደሰጠ ስለማይታወቅ በእምነት መመራት ብቻ ነው። ይሄ ደግሞ አንዳንድ ራስ ወዳድ ሰዎች እንዲፈጠሩ እና በምዕመናን ላይም የእምነት መሸርሸር እንዲፈጠር የማድረግ ችግር እየፈጠረ ይገኛል። አካሄዱ እጅግ ውስብስብ እና ጠለቅ ያለ ክትትልን የሚጠይቅ በመሆኑ ሙስናው እና የመልካም አስተዳደር ችግሩ ከዚህ የበለጠ ስር እየሰደደ ከመሄዱ በፊት መፍትሄ ሊፈለግለት ይገባል። ይሄን ማድረግ ካልተቻለ ግን ደብሮች ዋና የሙስና ቦታዎች እንዳይሆኑ ያስጋል። በተረፈ ግን በሳአሊተ ምህረት የተነሳው ነገር ሌሎች ደብሮችም መፈተሽ እንዳለባቸው አቅጣጫ የሰጠ ነው።

                           አቶ ሰለሞን በለጠ - ከቦሌ 

 

የትራፊክ አደጋ አለም አቀፍ ገዳይ ከሚባሉት በሽታዎች ተርታ እንደሚመደብ የአለም ጤና ድርጅት ገልጿል። አደጋው በተለይ እንደ ኢትዮጵያ ባሉ ሀገራት ላይ እያደረሰ ያለውን ጉዳት ለመግለፅ የሚከብድ እና ከመጠን ያለፈ ነው። የችግሩን ስፋት በመመልከትም የትራፊክ ትምህርት በስርዓተ ትምህርት ውስጥ ተካቶ በየትምህርት ቤቱ እንዲሰጥ ለማድረግ ከፍተኛ ጥረት እየተደረገ ይገኛል። ስለሁሉም ነገር ዜጎች በቂ እውቀትና ግንዛቤ እንዲኖራቸው መደረጉ መልካምና የሚበረታታ ሃሳብ ነው። ነገር ግን እውቀት ብቻውን ለውጥ ላያመጣ ይችላል። የትራፊክ አደጋን በተመለከተ አሁን እየተስተዋለ ያለው ችግር መንስኤ በአብዛኛው የቁጥጥር እና የአሰራር ክፍተት ይመስላል። በተለይ ከመንጃ ፈቃድ አሰጣጥጋር በተያያዘ በተደጋጋሚ ሲነሳ እንደነበረው በርካታ ህገ-ወጥ ስራዎች ይከናወናሉ። መንጃ ፈቃድ ለማውጣት የሚያስፈልገውን ሂደት ከማጠናቀቅ ይልቅ በአጭር ጊዜ እና በቀላሉ ወረቀት ለማግኘት የማይደረጉ ነገሮች የሉም። በአንድ ወቅት በኦሮሚያ ክልል ከነበረው የመንጃ ፈቃድ አሰጣጥ ጋር በተያያዘ ብዙ ነገር ሲባል እንደነበረ ሁላችንም የምናስታውሰው ነው። በአሁኑ ወቅትም አዲስ አበባን ጨምሮ በመላው ሀገሪቱ ያለው የመንጃ ፈቃድ አሰጣጥ ሊፈተሽ ይገባዋል። ብዙዎች የመንጃ ፈቃድ ለማግኘት ገንዘብ ብቻ በቂ እንደሆነ እያሳዩ ነው የሚገኙት። እነዚህ ከስልጠና ይልቅ በገንዘብ የሚገኙ የመረጃ ፈቃዶች ደግሞ የሚያስከትሉትን ውጤት በየዕለቱ እየተመለከትን እንገኛለን። በዘርፉ ባለው የቁጥጥር ክፍተት ሳቢያ በየእለቱ በርካቶች ህይወታቸውን አጥተው፣ ጥቂት የማይባሉም ንብረታቸው ወድሞ እና ህይወታቸው ተመሰቃቅሎ ቀርቷል። ቁጥጥር መፈለግ የሰው ልጅ ተፈጥሯዊ ባህሪይ መሆኑን በመገንዘብ በየጊዜው ጥብቅ ክትትል እና ቁጥጥር ማድረግ ቢቻል እየደረሰ ያለውን ችግር በተወሰነ ደረጃ መቀነስ ይቻላል። መማር እና መመራመር ባይከፋም ጎን ለጎን ግን ቁጥጥሩን አሰፈላጊ ነው።

                           በስልክ የተሰጠ አስተያየት 

በሴት ልጆች ላይ የሚፈፀሙ ጥቃቶች እንደኛ ባሉ ታዳጊ ሀገራት ውስጥ ብቻ ሳይሆን በሰለጠነው ዓለም ላይም ይተገበራሉ። ድርጊቱ በሌሎች ሀገራት ከተተገበረ በእኛ ሀገር ቢተገበር ምን ይደንቃል ለማለት ሳይሆን፤ በእኛ ሀገር ያለው ግን እጅግ ሰብአዊነት የራቀው መሆኑ ያሳዝናል። ሰሞኑን የኢትዮጵያ ሴቶች ማኅበር ቅንጅት እንደገለፀው በአንድ ዓመት ተኩል ጊዜ ውስጥ ብቻ ሦስት ሴቶች በአሲድ ጥቃት ደርሶባቸዋል። ይሄን መረጃ መስማት ለሰብአዊ ፍጡር እጅግ አሰቃቂ ሲሆን፤ ለሴቶች ደግሞ ተስፋ አስቆራጭ ነው። በየትኛውም ዓለም ላይ የሚገኙ ሴቶች ከድሮ ጀምሮ ለተለያዩ ጾታዊ ጥቃቶች ሲጋለጡ የኖሩ ቢሆንም በዚህ መልኩ ለዘግናኝ ጥቃት መጋለጥ ግን ለዚያውም በዚህ በሰለጠነ ዘመን፤ እጅግ አሳዛኝ ነው። ማኅበሩ በሆነ አጋጣሚ የደረሰውን መረጃ ጠቅሶ እነዚህን ሴቶች ይፋ አደረገ እንጂ በየአካባቢው እና በየቤቱ በርካታ ሴቶች ለመሰል ጥቃቶች ተጋልጠው የሚደርስላቸው ሳይኖር ተቀምጠው አሊያም ህይወታቸው አልፎ ሊሆን ይችላል።

 

የሴት ልጆች ጥቃት ሲነሳ ዋናው እና ግንባር ቀደሙ ተዋናይ ወንድ እንደመሆኑ ችግሩን ለመቅረፍ የመጀመሪያው ተግባር የወንዶችን አመለካከት መቀየር ነው የሚሆነው። ከወላጅ አባት እና ወንድም ጀምሮ ወንዶች ለሴት ልጆች ያላቸው የተንሻፈፈ አመለካከት እንዲቃና ማድረግ የሁሉም ሰው ኃላፊነት መሆን አለበት። በሴቶች እና ህፃናት ላይ አተኩረው የሚሰሩ አካላትም ከስር ጀምረው ወንዶች የግንዛቤ ለውጥ እንዲያመጡ የመስራት ኃላፊነት አለባቸው። አሁን እየታየ ያለው ነገር በዓመት አንድ ጊዜ ቀኑን ጠብቆ ይሄን ያህል ሴቶች ጾታዊ ጥቃት ደርሶባቸዋል። እያሉ ሪፖርት ከማቅረብ የዘለለ ቀጣይነት ያለው ስራ ሲሰሩ አይታዩም። በእርግጥ ቀኑን አስቦ መዋሉ እና ሌሎችንም ጉዳዩን እንዲያስቡበት ማስታወሱ መልካም ቢሆንም፤ ነገር ግን በ16 ቀናት ዘመቻ ብቻ ምንም አይነት ለውጥ ሊመጣ አይችልም። ለውጥ ማምጣት እና ሌሎች ሴቶችን ማዳን ከተፈለገ ሰፋ ያለ የግንዛቤ ማስጨበጫ ሥራዎችን መስራት እንዲሁም ሕጉ ጠንከር በሚልበት ሁኔታ ላይ ስራዎች ሊሰሩ ይገባል

/ሮ ሰላማዊት - ከፒያሳ¾


ሰሞኑን በሀገራችን በተለያዩ አካባቢዎች በተፈጠሩ አለመረጋጋቶች የሰዎች ህይወት እስከ ማለፍ እየደረሰ ነው። በተለይ የተማረ ዜጋን የማፍራት ትልቅ አላማ ሰንቀው በሚንቀሳቀሱ ከፍተኛ ትምህርት ተቋማት ዘንድ ችግሩ በስፋት እየተስተዋለ ይገኛል። የችግሩ መንስኤ ምንም ይሁን ምንም በተለይ ተማሪዎች በዚህ አይነት ሁኔታ ውስጥ መግባታቸው በጣም አስጨናቂ ጉዳይ ነው። ልጆች ተገቢውን እውቀት ቀስመው ይመጣሉ ብሎ የቻለውን ነገር ሁሉ አድርጎ ልጁን ለላከ ወላጅ ደግሞ እጅግ አስጨናቂ ነው። በርካታ ወላጆችም በከባድ ጭንቀት ውስጥ ነው ያሉት። በምን ሰዓት ምን ሊከሰት እንደሚችል እርግጠኛ መሆን ባለመቻላችን በከባድ ስጋት ውስጥ ነው ያለነው። ተማሪዎቹን ወደ ቤታቸው ለመመለስ ከትምህርት ገበታቸው ላይ  ማራቁ ሌላ ችግር እንዳለው በመገንዘብ እዚያው ባሉበት እንዲቆዩ ለመወሰን የተገደድን ብንኖርም ይሄንኛውም አማራጭ ሌላ ስጋት ውስጥ ከቶናል። መንግስት ከሌሎች በተለየ ሁኔታ በትምህርት ተቋማት አካባቢ እየተስተዋለ ያለው ችግር መፍትሄ እና መቋጫ እንዲኖው ጥረት ሊያደርግ ይገባል። በአሁኑ ወቅት ልጆችም ወላጆችም በከፍተኛ ስጋት ውስጥ ነው ያሉት። በየተቋማት ስላለው ሁኔታም ወላጆችም ሆኑ ሌላው ማህበረሰብ በቂ መረጃ እንዲያገኝ መደረግ ይኖርበታል። 

 

                           አቶ ሰኢድ - ከሳሪስ 

ሰሞኑን ፓርላማው ሴት የመንግሥት ሠራተኞች የወሊድ ፈቃድን በተመለከተ የቀረበለትን ረቂቅ አዋጅ አፅድቆታል። አዋጁ ሴት የመንግሥት ሠራተኞች ከወሊድ በኋላ የሚያርፉበት ጊዜ ከ60 ቀናት ወደ 90 ቀናት ከፍ እንዲል በአጠቃላይም የወሊድ እረፍቱ ከሦስት ወራት ወደ አራት ወራት ከፍ እንዲል አድርጓል። የአዋጁ መጽደቅ የሰው ልጅ ለሆነ ሁሉ የሚያስደስት ነው። በሰለጠነው ዓለም ያለውን ሁኔታ ስንመለከት የወሊድ ፈቃድ የሚሰጠው ለስድስት ወራት ነው። ይሄ ደግሞ ልጆች እስከ ስድስት ወራቸው ድረስ የእናታቸውን ጡት ብቻ እንዲጠቡ ለማድረግ ነው። በእኛ ሀገር ግን የወሊድ እረፍቱ ሦስት ወራት ሆኖ ሳለ ህፃናት እስከ ስድስት ወራቸው ድረስ የእናታቸውን ጡት ብቻ ይጥቡ እየተባለ ምክር ሲሰጥ ነበር። አሁን ግን ቢያንስ ጊዜው ከተጨመረ ይሄንን መምከሩ ብዙም ላያሳፍር ይችላል። ነገር ግን እዚህች ላይ ግራ የሚያጋባው ነገር ቢኖር በሀገራችን ስንት አይነት ሴቶች እንዳሉ ነው። አዋጁ የሚመለከተው ሴት የመንግስት ሰራተኞችን ነው ሲባል ለግል ድርጅት ሠራተኞች አይሰራም ማለት ነው። ነገር ግን በሁለቱም መስሪያ ቤቶች የሚገኙት ያው ሴቶች ሆነው ሳለ አዋጁ ለእነዚህ የማይሰራበት ሁኔታ መፈጠሩ ቅር ያሰኛል። ሁሉም ሴቶች በተመሳሳይ ሁኔታ ውስጥ እንደማለፋቸው አገለግሎት ላይ የሚውሉ ተመሳሳይ ሕጐችን መተግበርም አስፈላጊ ይመስለኛል። ነገር ግን አሁን ያለው ሁኔታ የመንግስት ሠራተኛ ለሆኑት ሴቶች ያደላ ነው። ይሄንን ጉዳይ በጥልቀት በመመልከት ለሁሉም ሴቶች እኩል ተግባራዊ ሊሆን የሚችልበት ሁኔታ ይኖር እንደሆነ ያሉትን መንገዶች ሁሉ መጠቀም ቢቻል መልካም ነበር። ነገር ግን አሁን ያለው ሁኔታ አንዷ ሰት ከሌላዋ የተለየች ናት እንዴ ያስብላል።

ወ/ሮ መሠረት ገበያው - ከሾላ

Page 1 of 23

Sendek Newspaper

Bole sub city behind Atlas hotel

Contact us