You are here:መነሻ ገፅ»መልዕክቶች
መልዕክቶች

መልዕክቶች (266)

ከሰሞኑ ቆሼ አካባቢ በሚኖሩ ወገኖቻችን ላይ የደረሰው አደጋ ሁላችንንም አንገት ያስደፋ እና ያሳዘነ ነገር ነው። በዚህ ክስተት በርካታ ወገኖቻችንን በማጣታችን ልባችን መሰበሩ ሳያንስ የተለያዩ ዓለም አቀፍ መገናኛ ብዙሃን ክስተቱን እየተቀባበሉ ገመናችንን ለዓለም በማሳየታቸው ሀፍረት ውስጥ እንድንገባ አድርጎናል። ነገር ግን ምንም ብናደርግ ልናስቆመው የማንችለው ነገር በመሆኑ ለመቀበል ተገደናል። አደጋውን ተከትሎም ለተጎጂዎች እና ቤተሰቦቻቸው ከተለያዩ አካላት የእርዳታ እጆች እየተዘረጉ ይገኛሉ። በችግር ወቅት መረዳዳቱ መልካምና የሚበረታታ ነገር ቢሆንም እነዚህ የእርዳታ እጆች ግን ለመዘርጋት የረፈደባቸው ይመስላሉ።

 

በዚህ በቆሼ አካባቢ ይኖሩ የነበሩ ዜጎች እንደግሪሳ ከሆነ ቦታ መጥተው በዚያ ቦታ የሰፈሩ ሳይሆኑ ህጋዊ ካርታ ይዘው በቦታው የሚኖሩ ዜጎች ናቸው። ነዋሪዎቹ ቆሻሻው እዚህ ደረጃ ላይ ከመድረሱ በፊት መንግሥት አንድ መፍትሄ እንዲሰጣቸው ጥያቄ አቅርበው ሰሚ ማጣታቸውን አሁን ላይ እየተናገሩ ይገኛሉ። ነገር ግን አሁን አደጋው የብዙዎችን ህይወት ከቀጠፈ እና ካበለሻሸ በኋላ መንግሥትም እርዳታ ሰጪ ነኝ ብሎ ተነስቷል። እውነት አዛኝ ከሆነ እና ለህዝቡ ተቆርቋሪ ነኝ የሚል ከሆነ የዚያን ጊዜ ጥያቄያቸውን ተቀብሎ ዘላቂ መፍትሄ ሊሰጣቸው በተገባ ነበር። ያ ባለመደረጉ ማንም ይሆናል ብሎ ያላሰበው አደጋ ተከስቷል። እነዚህ ሰዎች የሞቱት ዛሬ ሳይሆን እንደ ዜጋ ጥያቄያቸው ሰሚ ባጣበት ወቅት ነው። በቆሻሻ ተከበው በየዕለቱ በሞት አፋፍ ላይ ነበሩ ማለት ይቻላል። አሁን ቅን እና አሳቢ መስሎ መቅረቡ ምናልባት ለጊዜው ማረጋጊያ ይሆን እንደሆን እንጂ የተበላሸውን ነገር ወደ ኋላ ሊመልሰው አይችልም። ክስተቱ የብዙዎቻችንን ቅስም እንደሰበረው ሁሉ ለአንዳንድ ወገኖች ደግሞ ራሳቸውን የሚያስተዋውቁበት አጋጣሚን እየፈጠረላቸው ነው። ከዚህ በፊት እነዚህ ወገኖች የት እንዳሉ ዞር ብለው አይተዋቸው የሚያውቁ ሁሉ ዛሬ ላይ ቸርነታቸውን ለማሳየት እና ታዋቂነታቸውን ለማሳየት እየተጠቀሙበት ይገኛሉ። ይሄ አይነቱ ተግባር በሌላው ጉዳት ራስን ከመሸጥ ስለማይተናነስ ያስተዛዝባል። እዚህ ላይ መዘንጋት የሌለበት ነገር ቢኖር ዛሬም በርካታ መሰል አደጋ ያንዣበባቸው ወገኖች መኖራቸው ነው። በቆሻሻ ብቻ ሳይሆን በተለያዩ ችግሮች ዙሪያቸውን የተከበቡ በርካታ ዜጎች ከሆነ ጊዜ በኋላ እንዲሁ ላለው አደጋ ላለመጋለጣቸው እርግጠኛ መሆን አንችልም። የሞተ ለመቅበር አለን የሚል ወገን ሁሉ ሌላ ሞት ከመከሰቱ በፊት እነዚህን ወገኖች ሊመለከት ይገባል።

 

                        አስቻለው - ከኮልፌ 

የነዳጅ ዋጋ ለተወሰኑ ጊዜያት በተረጋጋ መልኩ በመቀጠሉ በሀገራችንም ዋጋው በነበረበት ቆይቷል። ከወራት በፊት ጀምሮ ግን በዓለም አቀፍ ደረጃ ዋጋው ጭማሪ አሳይቷል በሚል መንግስት በነዳጅ ዋጋ ላይ እንዲሁም በትራንስፖርት ታሪፍ ላይ ጭማሪ ማድረጉን ገልጿል። የዋጋ ጭማሪው በየወሩ ክለሳ የሚደረግበት ነው። ሰሞኑን ግን በተከታታይ ወራት (ከየካቲት ወር ጀምሮ) የዋጋ እና የታሪፍ ጭማሪ መደረጉን መንግስት ገልጾልናል። ምንም እንኳን የዋጋ ጭማሪው በሳንቲም እና በብሮች ደረጃ ቢሆንም ሲደማመር ግን ጫናው ከፍተኛ ነው። ኅብረተሰቡ በየአቅጣጫው የዋጋ ጭማሪ እንጂ ቅናሽ ተደርጐለት በማያውቅበት በአሁኑ ጊዜ በሣንቲሞች ደረጃም ቢሆን የሚደረገው ጭማሪ ኑሮውን እንደሚያከብድበት እሙን ነው። ከዚህ ከነዳጅ ዋጋ ጋር በተያያዘ በአብዛኛው ከመንግስት የምንሰማው ነገር የዋጋ ጭማሪ እንጂ ቅናሽ አይደለም። አንዳንድ የዓለም መገናኛ ብዙሃን ዋጋው በዓለም ገበያ ላይ ቅናሽ ማሳየቱን እየተናገሩ ባሉበት ጊዜ እንኳን መንግስት ዋጋ ቀንሼያለሁ ሲል አይሰማም። የነዳጅ ዋጋ መጨመርን ነቅቶ የሚከታተለውን ያህል ቅናሹንም ቢከታተል እና ለህዝብ የሚጠቅም ነገር ቢያደርግ መልካም ነበር።

የነዳጅ ነገር ሲነሳ ጉዳዩ አሳሳቢ የሚሆነው ለእኛ ለኢትዮጵያዊያን ብቻ ይመስለኛል። የዋጋ ጭማሪውን እግር በእግር እየተከታተለ በህዝቡ ላይም ጭማሪ የሚያደርገው የእኛ መንግስት ብቻ ይመስለኛል። የነዳጅ ዋጋን በተመለከተ በደርግ አገዛዝ ጊዜ የነበረውን ተሞክሮ መንግስት መለስ ብሎ ቢቃኘው መልካም ነበር። ጨቋኝ የተባለው የደርግ መንግስት እንኳን ዋጋ ጨመረ ብሎ የዋጋ ጭማሪ ማድረግ ቀርቶ ነዳጅን ይደጉም እንደነበረ የቅርብ ጊዜ ትዝታ ነው። አሁን ነገሮች ተሻሽለዋል በተባለበት ጊዜ ግን ድጐማውም ቀርቶ በዋጋ ጭማሪው ሲያማርረን ይታያል። መንግስት ያለ አግባብ በሸቀጦች ላይ የዋጋ ጭማሪ አድርገዋል ያላቸውን አካላት ለመከታተልና ለመቆጣጠር ጥረት እንደሚያደርገው ሁሉ ወደ ራሱም ተመልክቶ ቢያዝንልንና ተጨማሪ ጫና ባይፈጥርብን ጥሩ ነበር።

 

በስልክ - ከሜክሲኮ የተሰጠ¾

 

የመኪና ማቆሚያ ችግር መዲናችንን ከተበተቧት ችግሮች መካከል አንዱ ነው። ከችግሩ የተነሳ ብዙዎች መኪናዎቻቸውን ለማቆም የሚመርጡት ለእግረኞች ታስቦ በተሰሩ መንገድ ላይ አሊያም በመኪና መንገድ ጥጋጥግ ላይ ነው። የከተማዋ የመኪና መንገዶች ደግሞ ዕድሜ ጠገብ ከመሆናቸው  እና በጊዜው በነበረው የመኪና ብዛት መጠን የተሰሩ ከመሆናቸው የተነሳ አሁን ያለውን የተሸከርካሪ መጠን በአግባቡ ማስተናገድ የሚችሉ አይደሉም። የመንገዶቹ ጥበት ሳያንስ ዳር ዳራቸው ላይ መኪና ማቆም ለእግረኛውም ሆነ ለአሽከርካሪዎች ፈታኝ ነው። እግረኞችም ለተሽከርካሪ በተፈቀደ መንገድ ላይ ለመሄድ ይገደዳሉ። ይሄ ደግሞ በቀጥታም ሆነ በተዘዋዋሪ በሀገራችን ቀዳሚው ገዳይ ለሆነው የትራፊክ አደጋ መስፋፋት ዋና ምክንያት ነው። ተሽከርካሪ እና እግረኛ እየተጋፉ በሚሄዱበት ከተማ ላይ አንዴት የትራፊክ አደጋ በዛ ብሎ ለሚጠይቅ ሰው ይሄ ጥሩ እና በቂ ምላሽ ነው። መኪና ደርቦ ለማለፍ በሚደረግ ጥረት በርካታ አደጋዎች እንደሚርሱ በየዕለቱ የምንሰማውም ከዚህ የተነሳ ነው።

 

ቋሚ የሆነ የመኪና ማቆሚያ አለመኖር የሚያስከትለው አደጋ በዚህ ብቻ የሚያቆም አይደለም። ከዚሁ ከመንገዶች ጠባብነት ጋር ተያይዞ በመንገድ ዳርና ዳር ላይ ተሽከርካሪዎች በሚቆሙበት ወቅት ለእግረኛው ብቻም ሳይሆን ለሌሎች አሽከርካሪዎች መንገድ ይዘጋሉ። በዚህ ደግሞ በአስቸኳይ ማለፍ የሚያስፈልጋቸው እንደ አምቡላንስ እና የእሳት አደጋ ማጥፊያ ተሽክርካሪዎች ለማለፍ ሲቸገሩ እያስተዋልን ነው። እነዚህ ተሽከርካሪዎች ተግባራቸው ህይወት የማዳን ተግባር እንደመሆኑ እንቅስቃሴያቸው በደቂቃዎች እንኳን ቢዘገይ የሰው ህይወት ላይ ውሳኔ የመስጠት ጉዳይ ነው። ምንም እንኳን በቂ የሆነ የመኪና ማቆሚያዎች በመዲናዋ ባይኖሩም በተለይ በተሽከርካሪ መንገድ ጥግና ጥግ ላይ ተሽከርካሪዎች እንዳይቆሙ በማድረግ እነዚህን ከባድ ውሳኔዎች ማስቀረት ይቻላል፤ ያስፈልጋልም። በእርግጥ የውጭ ሀገራት መሪዎች በሚመጡበት ወቅት አሽከርካሪዎች ተሸከርካሪያቸውን በመንገድ ዳር አቁመው መሄድ እንደሌለባቸው ሲነገር እና ሲከለከል እናያለን። ነገር ግን በዘላቂነት ሲተገበር እና ዜጎችን የመታደግ ስራ ሲሰራ አናይም። ለሌላው አካል ታይታ ብቻም ሳይሆን ለዘላቂ መፍትሔ በማሰብ ቢሰራ መልካም ነው።

 

                              አቶ ሃይሉ ሰብስቤ - ከፊቼ

የአዲስ  አበባ ጤና ቢሮ የማህበረሰቡን ጤንነት ለመጠበቅ ከተሰጡት ኃላፊነቶች መካከል የምግብ ቤቶች የንጽህና አያያዝ ቁጥጥር አንዱ ነው። ይሄ ሲባል ደግሞ ምግብ የሚዘጋጅባቸው ቁሳቁሶች እና የመስሪያ ስፍራው ንጽህና ዋናው እና ተጠቃሹ ነው። ምግብ ቤቶች ለተጠቃሚ የሚያቀርቧቸው የመታጠቢያ ሳሙያዎች ደረጃቸውን የጠበቁ ፈሳሽ ሳሙናዎችን እንዲጠቀሙ ማድረግ ደግሞ አንዱ የቢሮው ኃላፊነት ነው። ነገር ግን አሁን በከተማዋ በሚገኙ የተለያዩ ምግብ ቤቶች እያየን ያለነው ነገር ቢሮው የስራ ድርሻውን መዘንጋቱን የሚያመለክት ነው። አብዛኞቹ ምግብ ቤቶች ጥቅም ላይ እየዋሉ የሚገኙት ፈሳሽ ሣሙናዎችን ሳይሆን ደረቅ ሣሙናዎችን ነው። ይባስ ብለው ለገላ መታጠቢያ ታስበው የሚሰሩ ሳሙናዎችን ለእጅ መታጠቢያነት የሚያውሉ ምግብ ቤቶችም እየተስተዋሉ ነው። እነዚህ ለገላ መታጠቢያ ተብለው የሚዘጋጁ ሣሙናዎች በአብዛኛው ሽታ ያላቸው ስለሆኑ በእነርሱ ታጥቦ ምግብ ለመመገብ አስቸጋሪ ነው የሚሆነው።

 

ትዕዛዙን አክብረውም ይሁን በራሳቸው ተነሳሽነት ሳይታወቅ ፈሳሽ ሣሙናዎችን የሚጠቀሙ አንዳንድ ምግብ ቤቶች ቢኖሩም እነርሱም ግን ከጥራት ጋር የተያያዘ የራሳቸው ችግር አለባቸው። ሲጀመር ሳሙናዎቹ በስመ ጥቃቅንና አነስተኛ በየመንደሩ ውስጥ የሚዘጋጁ በመሆናቸው ተገቢውን የጥራት ደረጃ ስለማሟላታቸው ማረጋገጫ የለም። ይሄም አልበቃ ብሎ ደግሞ ምግብ ቤቶቹ ሳሙናውን ለመቆጠብ በማሰብ ሳሙናው ውስጥ ውሃ በመጨመር ሳሙናውን ያቀጥኑታል። በዚህም ሳቢያ ተገቢውን እና አስፈላጊውን የማፅዳት አገልግሎት መስጠት አይችሉም። ቢሮው አንድ ሰሞን ይሄንን ጉዳይ ለመቆጣጠር ሲንቀሳቀስ ቢስተዋልም ከአንድ ሰሞን አጀንዳነት ሳያልፍ ቀርቷል። እንዲህ አይነቱ ተግባር ቀጣይነት ያለው ክትትልን የሚጠይቅ በመሆኑ ቢሮው ቢያስብበት።

 

                                 በስልክ - ከቦሌ አካባቢ የተሰጠ አስተያየት  

በአፍሪካ በትልቅ ኢንቨስትመንት ስራ ላይ የተሰማራው ዳንጎቴ ኢንዱስትሪ በሀገራችንም ከሲሚንቶ ፋብሪካ በተጨማሪ ወደ ስኳር ምርት የመግባት ፍላጎት አሳይቷል። መንግስትም ምስጋና ይግባውና ፈቃደኝነቱን እያሳየ ይገኛል። በዚህ ውሳኔ መንግስት ሊመሰገን ይገባዋል። እግረ መንገዱንም በሌሎች ጉዳዮች ላይም እንዲህ አይነት ፈቃደኝነትን ቢያሳይ መልካም ነው። ሁሉንም ነገሮች መንግስት በብቸኝነት ማከናወን እንደማይችል ተረድቶ የውጭ አካላት እንዲሳተፉበት ቢያደርግ ጥሩ ነው። መንግስት በአሁኑ ወቅት በርካታ ከአቅሙ በላይ የሆኑ ነገሮች እያሉ ሁሉንም ነገር ራሴው አደርገዋለሁ የሚልበት ሁኔታ ላይ አይደለም ያለው። በዚህም ሳቢያ ፕሮጀክቶች እየተጓተቱ እና ጭራሹንም እየተሰረዙ ይገኛሉ። በከተማችን እጅግ አንገብጋቢ በሆኑ እንደ መኖሪያ ቤት፣ ትራንስፖርት እና ሌሎች መሠረታዊ ጉዳዮች ላይም የመስራት አቅምና ፍላጎት ያላቸውን የውጭ አካላት ማሳተፍ ቢቻል ችግሮቹን በአፋጣኝ እና በቀላሉ ለመቅረፍ ያግዛል። በዚህ በኩል የሌሎች ሀገራትን ተሞክሮ መመልከትም ያስፈልጋል። የውጭ ባለሀብቶች ለትርፋቸው ሲሉ በሚሰሯቸው የኢንቨስትመንት ስራዎች ሀገርን ማሳደግ ዜጋንም መጥቀም ብቻ ሳይሆን የተሻለ ተሞክሮ ለመያዝ ይረዳልና መንግስት በሌሎች መስብችም እንዲለምድበት እንመኛለን። ግዙፍ የሆኑ የሀገር ችግሮችን ለብቻ ሳይሆን ለሌሎች በማጋራት ብቻ ነው መቅረፍ የሚቻለው። እግረመንገዱም ለዜጎች የስራ እድል በመፍጠር በሌላኛው አቅጣጫ ያለውን የስራ እምነት ችግር ጭምር መቅረፍ ይቻላል።   

 

እፀገነት ብርሃኑ

በአዲስ አበባ ብሎም በተለያዩ የሀገሪቱ አካባቢዎች በሚሰጡ የህዝብ ትራንስፖርት አገልግሎቶች ላይ በርካታ ቅሬታዎች በተደጋጋሚ ይነሳሉ። ለቅሬታዎቹ የሚመለከታቸው አካላት የየራሳቸውን ምክንያት እያቀረቡ ነው የሚገኙት። የሚሰጡት ምክንያቶች ምንም ይሁኑ ምንም አሁንም ግን ከዚህ ከትራንስፖርት ችግር ጋር ተያይዞ የትራፊክ አደጋዎች እየተበራከቱ እና የሰው ህይወትም እየወደመ ይገኛል። ሰሞኑን ደግሞ በትራንስፖርቱ ዘርፍ ችግሮች እየተፈጠሩ ያሉት የተሽከርካሪዎች ብቃት አነስተኛ በመሆኑ፣ ዘርፉን የሚመሩት የአመራር አካላት ብቃት ማነስ እንዲሁም እድሜያቸው ላልደረሰ ታዳጊዎች የመንጃ ፈቃድ በመስጠት ተሽከርካሪ እንዲያሽከረክሩ ማድረግ ናቸው እየተባለ ይገኛል። የተሰጡትን ምክንያቶች ደማምረን ብንመለከታቸው ዞሮ ዞሮ የትኩረት አቅጣጫው ወደ መንግስት የሚያነጣጥር ሆኖ ነው የምናገኘው። እስከዛሬ ድረስም እየተሰማ ያለው በመንጃ ፈቃድ አሰጣጡ ሂደት ላይ ብዙ ግልፅ ያልሆኑ እና የተሳሳቱ አካሄዶች መኖራቸውን ነው። ይሄ ደግሞ እድሜያቸው ላልደረሰ ታዳጊዎች መንጃ ፈቃድ መስጠት፣ ተገቢውን ስልጠና ሳያጠናቅቁ በገንዘብ መንጃ ፈቃድ እንዲያገኙ በማድረግ እና በመሳሰሉት የሚገለፅ ነው። የተሽከርካሪ ብቃትንም በተመለከተ አሰራሩ በሙስና የተተበተበ በመሆኑ የመጨረሻ ውጤቱ ከዚህ የተለየ ይሆናል ብሎ መጠበቅ አይገባም። የችግሮቹ መንስኤ ያም ሆነ ይህ ድምር ውጤቱ ግን በሰው ህይወት ላይ ማብቂያ የሌለው ጉዳትን ማድረስ ነው። በየጊዜው ምክንያቶችን እየደረደሩ አንዱ በሌላው ላይ በማላከክ የሚገኝ ውጤት አይኖርም። እስካሁን የተዘረዘሩት የችግር መንስኤዎች ከበቂ በላይ በመሆናቸው ቀጣዩ እርምጃ ሊሆን የሚገባው መፍትሄ ማፈላለጉ ላይ ነው። እድሜ ልክ ችግርን ብቻ እያዥጐደጐዱ መቀጠል አይቻልም። በዘርፉ ያለውን የተደራሽነት ችግር መቅረፍ ባይቻል እንኳን ያለውን የትራንስፖርት አገልግሎት በስነ-ስርዓት ማስተዳደር ተገቢ ነው። ይሄን ማድረግ ካልተቻለ በየዕለቱ በትራፊክ አደጋ የሰዎች ህይወት ማለፉ ይቀጥላል። ነገሮችን ማስተካከል ሲቻል የሰው ልጅ ህይወትን እየሰዋን እስከመቼ መቀጠል እንደምንችል ቆም ብለን ማሰብ ይኖርብናል።

ያሬድ ተሰማ - ከመገናኛ¾

 

ትልቅ ተስፋን ከጣልንባቸው እና ለሀገራችን አዲስ ምዕራፍ ከሆኑ ነገሮች አንዱ ቀላል ባቡር ነበር። የባቡር ትራንስፖርት አገልግሎት መስጠት ሲጀምር የከተማችንን የትራንስፖርት ውጥረት ያስተነፍሳል የሚል ትልቅ ተስፋን በሁላችንም ዘንድ ፈጥሮ ነበር። ሆኖም ግን ገና ፍቅራችን እንኳን ሳያልቅ አንድ ጊዜ ከኤሌክትረክ ኃይል ጋር ሌላ ጊዜ ደግሞ ከመለዋወጫ እቃዎች ጋር በተያያዘ ባቡሩ ጣጣ ማብዛት እና ወገቤን ማለት ጀመረ። አሁን ደግሞ ይባስ ብሎ ለከፍተኛ ኪሳራ መዳረጉ እና እየሰጠ ያለው አገልግሎትም ካለመኖር የማይሻል መሆኑ እየተነገረ እኛም እያስተዋልነው ነው። ያን ያህል ወጪ የወጣበትና ብዙ ተስፋ የተጣለበት ነገር እንዲህ በአጭሩ በመቅረቱ የሁላችንንም ቅስም ነው የሰበረው። ነገርየው ገና ከጅምሩ ብዙ የተወራለት እና ብዙ የተጓጓለት ከመሆኑ የተነሳ ስራው እንኳን በአግባቡ ሳይጠናቀቅ ከፍተኛ የሀገራችን ባለስልጣናት ባሉበት ተመርቆ ስራ እንዲጀምር መደረጉን ሁላችንም እናስታውሳለን። ለታይታ እና በሌሎች ጎሽ ለመባል ይመስል ተሽቀዳድመን መርቀን ስራ ስናስጀምር ስለዘለቄታው ያሰብንበት አይመስልም። አለባብሰው ቢያርሱ በአረም ይመለሱ እንዲሉ የዚያን ጊዜ አለባብሰን ያለፍናቸው ስህተቶች ውለው ሲያድሩ እውነትነታቸው ከመውጣት አልፎ የህዝብ እና የሀገር ሀብት ባክኖ እንዲቀር አድርጎታል።

 

በሀገራችን በዚህ መልኩ ውጤት የናፈቃቸው በርካታ ፕሮጀክቶችን በብዛት ከማስተዋላችን የተነሳ አሁን አሁንማ እየለመድነው መጥተናል። ግን እስከመቼ ነው በዚህ መልኩ ከስህተት ወደ ስህተት እየተሸጋገርን የምንዘልቀው? ይሄንኛውም እክል የምንማርበት ችግር ነው እንደማይሉን ተስፋ አለን። ለመማሪያነት በቢሾፍቱ የከተማ አውቶቡሶች ላይ የገጠመን ችግር ይበቃናል። ይሄንኛው ግን ሀገራችንን ለሌሎች ሀገራት መጫወቻ ማድረግ መስሎ ነው የሚታየው። እውቀቱ እና ክህሎቱ አላቸው ተብለው የተመረጡ ባለሞያዎችን በአግባቡ ተከታትሎ ደረጃውን የጠበቀ ስራ እንዲሰሩ ማድረግ ሲገባ ስህተቶቻቸውን እየሸፈኑ እና ያቀረቡትን ሁሉ ዝም ብሎ እየተቀበሉ መጨረሻውን በስህተት መደምደም በሀገር ላይ መቀለድም ጭምር ነው። እንዲህ አይነቱን የማይታለፍ ስህተት የሰሩ ሰዎች በዜጋና በሀገር ላይ ለሰሩት ስህተት የታሪክ ተወቃሽ ከመሆናቸውም በላይ በህግ ተጠያቂ የሚሆኑበት እና የስህተቱ መሰረትም ተጣርቶ የሚቀርብበት ሁኔታ መኖር አለበት።

በስልክ ከሳሪስ የተሰጠ አስተያየት 

 

ከቅርብ ጊዜ ወዲህ ጥቃቅን እና አነስተኛ የፈጠራ ስራዎች በየአካባቢው እየተስፋፉ ይገኛሉ። ይሄን ዕድል በመጠቀምም በርካታ ሰዎች እንደ ሳሙና እና ሌሎች የባልትና ውጤቶችን በየቤታቸው እያዘጋጁ ለገበያ ሲያቀርቡ ይታያሉ። በተለይ ፈሳሽ ሳሙናን በተመለከተ ስልጠና የሚሰጡ ትናንሽ ተቋማት ከባልትና ውጤቶች መካከል አንዱ የሆነው ኮምጣቴ ወይም አቼቶ ይገኝበታል። እንደስራ ፈጠራ አዲስ ነገር ለመሞከር ያላቸው ተመሳሽነት ሊበረታታ ይችላል። ነገር ግን ይህ ምርት ሲመረት የጥራት ደረጃውን በጠበቀ መልኩ እና አስፈላጊውን የምግብ ይዘት አሟልቶ ስለመዘጋጀቱ ምንም አይነት መረጃ የለም። ምርቶቹ በሚቀርቡባቸው ማሸጊያዎች ላይም ምንም አይነት ማብራሪያ አይገኝም። ምርቶቹ ለምግብነት የሚውሉ እንደመሆናቸው መጠን ደረጃቸው እና የምግብ ይዘታቸው በደንብ ተገልፆ መቅረብ ይኖርበታል። የንፅህና መጠበቂያ የሆኑ ደረቅና ፈሳሽ ሳሙናዎችን በውሃ ማስወገድ ስለሚቻል ያን ያህል አሳሳቢ ባይሆንም ምግብ ነክ በሆኑ ነገሮች ላይ ግን ጥንቃቄ ማድረግ የሚያስፈልግ ይመስለኛል። ይዘታቸው እና ደረጃቸው ተረጋግጦ በምን መልኩ መጠቀም እንደሚገባም ግልፅ የሆነ መመሪያ ማስቀመጥ የደረጃዎች ባለስልጣን ኃላፊነት ነው። ዛሬ በእነዚህ ምርቶች ላይ ቁጥጥር ማድረግ ካልተቻለ በቀጣይ ሌሎች በርካታ የምግብ እና የመጠጥ አይነቶች በየመንደሩ ውስጥ ተዘጋጅተው ስላለመቅረባቸው እርግጠኛ መሆን አይቻልም። ልክ እንደ ጠላ እና አረቄ ማንኛውም ሰው ብድግ ብሎ በየቤቱ እያዘጋጀ ለገበያ ሊያቀርባቸው ይችላል። እነዚህ የጥራት ደረጃቸው እና የምግብ ይዘታቸው በሳይንሳዊ መንገድ ያልተረጋገጠ የምግብ አይነቶች ይዘውት የሚመጡት የጤና ችግር ደግሞ በቀላሉ ሊታይ አይገባም። የሚመለከተው አካል ከአሁኑ መፍትሄ ሊያፈላልግለት ይገባል።

ማህሌት - ከመገናኛ

 

በመንግሥት መስሪያ ቤቶች ለሚሰሩ ሠራተኞች የሚደረገው የደመወዝ ጭማሪ ከሰሞኑ በህዝብ ተወካዮች ምክር ቤት መፅደቁን ሰምተናል። የደመወዝ ጭማሪውን በተመለከተ ከዚህ ቀደም በተደረጉ ጭማሪዎች ላይ የተለያዩ ቅሬታዎች ሲሰሙ ቆይተዋል። በተለይ ወርሃዊ ደመወዛቸው ዝቅተኛ የሆነ የመንግስት ሠራተኞች ጭማሪው በፐርሰንት ሲሰላ የሚደርሳቸው ገንዘብ አነስተኛ በመሆኑ ከጭማሪው የተጠቀሙት ነገር እንደሌለ ሲገልፁ ነበር። ላለው ይጨመርለታል እንዲሉ የደመወዝ ጭማሪው ለከፍተኛ ደመወዝ ተከፋዮች ያደላ እንደሆነም ሲገለፅ ቆይቷል። ጭማሪው ሲታይ እውነትም ወደከፍተኛ ደመወዝ ተከፋዮች ያመዘነ ይመስላል። እንደሚታወቀው በአንድ መስሪያ ቤት ውስጥ ከፍተኛ ደመወዝ ተከፋይ የሚሆኑት ኃላፊዎች እና ልዩ ባለሞያዎች ናቸው። እነዚህ የሠራተኛ ክፍሎች ደግሞ ከወርሃዊ ደመወዛቸው በተጨማሪም የመኖሪያ ቤት እና የተለያዩ ጥቅማ ጥቅሞቻቸው የተጠበቀላቸው ናቸው። በዚህ ላይ በከፍተኛ ፐርሰንት የደመወዝ ጭማሪ ሲደረግላቸው ሲታይ ጭማሪው ለእነዚህ አካላት ያደላ ነው ለማለት ያስገድዳል።

 

ዝቅተኛ ደመወዝ ተከፋዮችን ስንመለከት ደግሞ ከደመወዝ ጭማሪው ከሚያገኘው ጥቅም ይልቅ የሚያጣው ነገር የሚበልጥ ይመስላል። ምክንያቱም ከፍተኛ ደመወዝ ተከፋዩ ጥሩ ጭማሪ ሲደርግለት የመግዛት አቅሙ እየጨመረ ስለሚመጣ ገንዘብ ለማውጣት አይሳሳም። ይሄንን አጋጣሚ የሚጠብቁ አንዳንድ ነጋዴዎችም በዚህ ምክንያት በሁሉም ነገሮች ላይ የዋጋ ጭማሪ ከማድረግ አይቦዝኑም። በመሆኑም በመኖሪያ ቤት ኪራይ እና በተለያዩ ሸቀጣሸቀጦች ላይ የሚኖረው የዋጋ ጭማሪ ዞሮ ዞሮ ጫናው የሚያርፈው ዝቅተኛ ደመወዝ ተከፋይ በሆኑ ሠራተኞች ላይ ነው። ስለዚህ የደመወዝ ጭማሪውን ከማፅደቅ አስቀድሞ ሁለቱንም ገፅታዎች ማጤኑ መቅደም ነበረበት። መንግሥትም ልክ የደመወዝ ጭማሪውን አስቦበት እንዳፀደቀው ሁሉ የመኖሪያ ቤት ኪራይ ተመንን በማውጣቱ እና ሸቀጣሸቀጦች ላይ የዋጋ ጭማሪ የሚያደርጉ ነጋዴዎች ላይ የሚደረገውን ቁጥጥር ማጠናከሩ ላይም ሊበረታ ይገባ ነበር። አሁንም ቢሆን እነዚህን ወሳኝ እርምጃዎች በመውሰድ አብዛኛውን ህዝብ ሊታደግ የሚችለው መንግሥት ነው። ይሄ መሆን ካልቻለ ግን አብዛኛው የህብረተሰብ ክፍል እየተጎዳ ጥቂቶች ደግሞ የሚጠቀሙበት አሰራርን መዘርጋት ነው የሚሆነው።

 

                                    በስልክ - ከስታዲየም የተሰጠ አስተያየት 

 

በሀገራችን ትምባሆ በጤና የሚያስከትለውን ጉዳት ለማስቀረት ያግዛል የተባለው መመሪያ ወጥቶ ከፀደቀ ዓመታትን አስቆጥሯል። በየጊዜውም ሲጋራ የሚያስከትላቸውን የጤና እክሎች በተመለከተ ማብራሪያ እየተሰጠ ነው። ነገር ግን መመሪያውን ወደ ተግባር ለመቀየር የሚደረገው ጥረት ፍሬ ሲያፈራ እና ለውጥ ሲያመጣ አይታይም። ሌላው ቢቀር እንኳን ትምባሆ የማይጨስባቸው ተብለው ተለይተው በተቀመጡ ስፍራዎች እንዳይጨስ የማድረግ ተግባሩ ተጠናክሮ ሲሰራበት አይታይም። በዚህም ሳቢያ በየምግብ ቤቶች እና መዝናኛ ቦታዎች ብሎም ህፃናት ጭምር በሚገኙባቸው አካባቢዎች ትምባሆ ሲጨስ ይስተዋላል። ይሄን መመሪያ እንዲያስፈፅም በመንግስት ኃላፊነት የተጣለበት ተቋም ደግሞ የምግብ፣ መድሐኒትና ጤና ክብካቤ አስተዳደርና ቁጥጥር ባለስልጣን ነው። ባለስልጣኑ እስከ አሁን አዋጁን ለማስፈፀም የሄደበት ርቀት ምን ያህል ዘገምተኛ እንደሆነ ለውጥ አለመምጣቱን አይቶ መረዳት ይቻላል። ሌላው ቢቀር ምግብ ቤቶች እና መዝናኛ ቦታዎች ሲጋራ እንዳይጨስባቸው ኃላፊነታቸውን እንዲመጡ ማድረግ ሲችል፣ ይሄ ባለመሆኑ አንድ ምግብ ሊመገብ የገባ ሰው ሳይወድ በግዱ ሲጋራ ይጨስበታል። ህጋዊ ኃላፊነት ያለበት አካል እያለ እንዲህ አይነቱ ነገር መከሰት አልነበረበትም። አሁን እየተባለ እንዳለው ከሆነም በእነዚህ ትምባሆ ማጨስ በተከለከለባቸው ስፍራዎች ማጨስ ሊያስቀጣ የሚችለው ቅጣት እንኳን በግልፅ ተለይቶ አልተቀመጠም። እንደሚገባን ከሆነ መመሪያውም ገና ሊመረመር የሚገባው ነው። ችግሩ ጊዜ የማይሰጥ እና ትውልድን እስከማጥፋት የሚደርስ አሉታዊ ተጽዕኖን የሚያስከትል እንደመሆኑ ለነገ ሊባል የሚገባው አይደለም። መመሪያውን መመርመር ካስፈለገም መርምሮ ወደተግባር በመግባት ኃላፊነቱን የመወጣት ግዴታው የባለስልጣ ነው።

                                          በቀለ ታደሰ - ከበሌ  


Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100

Warning: Illegal string offset 'active' in /home/sendekne/public_html/templates/leo_news/html/pagination.php on line 94

Warning: Illegal string offset 'active' in /home/sendekne/public_html/templates/leo_news/html/pagination.php on line 100
Page 1 of 19

Sendek Newspaper

Bole sub city behind Atlas hotel

Contact us