You are here:መነሻ ገፅ»ዜና

“የሥራ ማቆም አድማን በማሳበብ በኦሮሞ ስም የግለሰቦች እና የመንግስትን ሀብት የመዝረፍና ማውደም ተግባራት እየተፈጸመ ነው”

Wednesday, 14 February 2018 11:53

“የሥራ ማቆም አድማን በማሳበብ በኦሮሞ ስም የግለሰቦች እና የመንግስትን ሀብት የመዝረፍና ማውደም ተግባራት እየተፈጸመ ነው”

ዶክተር አብይ አህመድ
የኦህዴድ ጽ/ቤት ኃላፊ

 

የኦሮሞ ህዝብ ዴሞክራሲያዊ ድርጅት (ኦህዴድ) ጽህፈት ቤት ኃላፊ ዶክተር አብይ አህመድ በኦሮሚያ አንዳንድ አካባቢዎች መንገድና የንግድ ተቋማትን መዝጋት ከዛሬ ጀምሮ እንዲቆም ጥሪ አቀረቡ።


ዶክተር አብይ ትላንት በሰጡት መግለጫ፣ “ህዝብ አንድ ላይ በመደራጀት ሰላማዊ በሆነ መንገድ የራሱን መንግስት ማስገደድ እና ጫና በመፍጠር የተለያዩ ጥያቄዎችን ማንሳት በዴሞክራሲያዊ ስርዓት ውስጥ ወሳኙ ነገር ነው ብለዋል። አያይዘውም፣ ሆኖም ግን ማንኛውንም ጥያቄ በምን መልኩ መቅረብ እንዳለበት እንዲሁም ግራ እና ቀኙን አስተውሎ መመልከት እና ማሰብ ያስፈልጋል ነው ያሉት። ህዝብ እና የሀገርን ሀብት በማይጎዳ መልኩ መሆን ይገባዋል ሲሉ ዶክተር አብይ አሳስበዋል።


በአሁኑ ወቅት ከሥራ ማቆም ጋር ተያይዞ እየተነሱ ካሉ ጥያቄዎች ውስጥ “የታሰሩ ሰዎች ይፈቱልን” የሚል ጥያቄ እየተነሳ መሆኑንም ዶክተር አብይ አስታውሰው፤ ይህን ጉዳይ አመራሩ ከጥልቅ ተሃድሶው በኋላ ዋና ስራው አድርጎ በመውሰድ በእስር ላይ የሚገኙ ሰዎች ተለቀው በተለያዩ የልማት ስራዎች እንዲሰማሩ ለማድረግ መወሰኑንም ነው ይፋ አድርገዋል።


“እስር ከበዛ ህዝብ ይቸገራል፤ ማደግም ሆነ መለወጥ አይችልም” ያሉት ዶክተር አብይ፣ “ስለዚህም የእስረኞች መለቀቅ ጉዳይን ዋነኛ አጀንዳችን በማድረግ እየሰራን ቆይተናል” ብለዋል።


አጀንዳ ብቻ ሳይሆን ተጨባጭ ስራዎች መስራት እንደተቻለ ያስታወሱት ዶክተር አብይ፣ ከጥልቅ ተሃድሶው ወዲህ በኦሮሚያ ክልል ስልጣን ስር የነበሩን ከ30 ሺህ በላይ ሰዎችን ከእስር መፍታት መቻሉንም አስረድተዋል።


የፌደራል መንግስት መስራት ባለበት ጉዳይ ላይም ድርጅታቸው ጠንካራ ትግል ማካሄዱን እና በፌደራል ደረጃ የተሰሩ ሥራዎች መኖራቸውን በማሳያ አስቀምጠዋል፤ ይኸውም፣ ጉዳያቸው በፌደራል ደረጃ እየታየ ካሉ ሰዎች ውስጥም ከግማሽ በላዩ ክሳቸው ተቋርጦ ከእስር እንዲፈቱ መደረጉን አንስተዋል።


ዶክተር አብይ ከስራ ማቆም አድማ ጋር በተያያዘ እንደተናገሩት፣ “አሁን ላይ ድርጅቱ ህዝቡን የሚጠቅሙ ታላላቅ እርምጃዎችን መውሰድ በጀመረበት ወቅት የሥራ ማቆም አድማን በማሳበብ በኦሮሞ ስም የግለሰቦች እና የመንግስትን ሀብት የመዝረፍና ማውደም ተግባራት እየተፈጸመ መሆኑንም” ገልጸዋል።


ከዚህ ባለፈም በክልሉ የሚገኙ ብሄር ብሄረሰቦችን ላይ ጥቃት መፈጸም፣ የፀጥታ አካላት ላይ ጉዳት የማድረስ እና መሰል ተግባራት እየተፈፀሙ መሆኑንም በመግለጫቸው አንስተዋል። ይህ በማንኛውም መመዘኛ ተቀባይነት የለውም ያሉት ዶክተር አብይ፣ ይህንን እንቅስቃሴ ከለላ በማድረግ ጉዳት እያደረሱ ያሉ አካላት እንዳሉና ጉዳዩ በህግ የበላይነት መስተካከል እንዳለበት አስረድተዋል።


በኦሮሚያ ውስጥ ማንኛውም ሰው ህጋዊ በሆነ መንገድ ሰርቶ የመኖርና የመንቀሳቀስ መብት እንዳለውም ነው የገለጹት ዶክተር አብይ፣ አሁን እየተነሱ ባሉ እና ሌሎች ጉዳዮች ላይ የክልሉ መንግስት ትኩረት በመስጠት እየሰራ ነው፤ ውሳኔ ላይም ተደርሷል ብለዋል።


ስለዚህ ወጣቶች ሁሉንም ነገር በትዕግስት መጠባበቅ እንዳለባቸውና መንገድ መዝጋት እና ሰዎች የንግድ ተቋማቸውን እንዲዘጉ ማስገደድ ትክክል አይደለም ነው ያሉት ዶክተር አብይ።


ዶክተር አብይ በሰጡት ማሳሰቢያም፣ አሁን እየተካሄደ ያለው ተግባር በአስቸኳይ መቆም አለበት ብለዋል።


አሁን እየተካሄደ ያለው ተግባር ወዳልተፈለገ አላማ ሊለወጥና የኦሮሞ ህዝብ እና ወጣቶችን ሊጎዳ ስለሚችል፣ የክልሉ ህዝብ እና ወጣቶች ከዛሬ ጀምረው ከስራ ማቆም ጋር የተያያዙ እንቅስቃሴዎችን ማስቆም አለባቸው ሲሉም ጥሪ አቅርበዋል።

ይምረጡ
(0 ሰዎች መርጠዋል)
1949 ጊዜ ተነበዋል

Sendek Newspaper

Bole sub city behind Atlas hotel

Contact us